अमेरिकेत सध्या वर्णद्वेषविरोधी आंदोलन सुरु आहे. या आंदोलनामुळे संपूर्ण अमेरिका पेटून उठली आहे. हॉलिवूड सिनेसृष्टीतील अनेक मोठ्या कलाकारांनी ब्लॅक लिव्ह्स मॅटर म्हणत या आंदोलनात भाग घेतला आहे. बॉलिवूडची देसी गर्ल प्रियांका चोप्रा हिने देखील वर्णद्वेषाविरोधात आवाज उठवला आहे. खरं तर प्रियांकाला देखील तिच्या रंगावरुन चिडवले जात होते. हा धक्कादायक अनुभव तिने एका मुलाखतीतून सांगितला आहे. काय म्हणाली प्रियांका? "लहान असताना माझे मित्र मंडळी मला रंगावरुन चिडवायचे. माझा रंग सावळा असल्यामुळे ते मला ब्राऊनी म्हणायचे. कुटुंबातील माझी सर्व भावंड गोरी आहेत. त्यांच्या तुलनेत माझा रंग गडद आहे. कारण माझे बाबा गोरे नव्हते. परिणामी माझी भावंडं लहान असताना मला रंगावरुन चिडवायचे. सुरुवातील मी खूप चिढायचे. विविध क्रिम्स लावून गोरं होण्याचा प्रयत्न करायचे. पण नंतर त्वचेच्या रंगामागील वैज्ञानिक कारण कळलं त्यानंतर माझी चिढचिढ कमी झाली." असा अनुभव एनडीटीव्हीला दिलेल्या मुलाखतीत प्रियांकाने सांगितला होता. वर्णद्वेषाविरोधात सुरु असलेल्या आंदोलनाला भारतीय कलाकारांनीही पाठिंबा दर्शवला आहे. या पार्श्वभूमीवर प्रियांकाचा ही मुलाखत सध्या चर्चेत आहे.