अभिनेता सुशांत सिंह राजपूतच्या आत्महत्येनंतर सोशल मीडियावर बॉलिवूडमधल्या घराणेशाहीविरोधात तीव्र संताप व्यक्त होत आहे. करण जोहर, आलिया भट्ट, सलमान खान यांसारख्या सेलिब्रिटींविरोधात नेटकरी राग व्यक्त करत आहेत. सुशांतचेही जुने पोस्ट, ट्विट पुन्हा एकदा व्हायरल होऊ लागले आहेत. २०१५ मध्ये सुशांतने आलिया भट्टवर नाराजी व्यक्त करत एक ट्विट केलं होतं. त्याची सध्या सोशल मीडियावर चर्चा होत आहे. सुशांतच्या 'राबता' या चित्रपटासाठी आधी आलिया भट्टची निवड झाली होती असं म्हटलं जातं. मात्र ऐनवेळी तारखा जुळत नसल्याचं कारण देत तिने चित्रपटातून काढता पाय घेतला. तेव्हा तिच्या जागी क्रिती सनॉनला घेण्यात आलं. करण जोहरच्या 'शुद्धी' या चित्रपटासाठी आलियाने सुशांतचा 'राबता' सोडल्याचं म्हटलं जात आहे. 'टाइम्स ऑफ इंडिया'ने दिलेल्या वृत्तानुसार सुशांतने त्यावेळी ट्विट करत म्हटलं होतं, 'हे खूप मजेशीर आहे की लोक स्वत:च्या फायद्यासाठी दुसऱ्यांच्या प्रोजेक्टचं नुकसान करतात.' सुशांतचं हे ट्विट आता डिलिट करण्यात आलं आहे. आणखी वाचा : आत्महत्येच्या तीन दिवस आधी सर्व कर्मचाऱ्यांचे पगार देऊन सुशांत म्हणाला. रविवारी (१४ जून) सुशांतने मुंबईतल्या राहत्या घरी गळफास घेऊन आत्महत्या केली होती. त्याच्या आत्महत्येमागचं नेमकं कारण अद्याप समजू शकलेलं नाही. मात्र गेल्या सहा महिन्यांपासून तो नैराश्यात असल्याचं म्हटलं जात आहे.
