हिंदी चित्रपट सृष्टीत नव्वदच्या दशकामध्ये विविध कलाकारांच्या प्रेमप्रकरणांच्या चर्चांना उधाण आले होते. संजय दत्त, सलमान खान, माधुरी दीक्षित यांसारख्या कलाकारांची नावेही या यादीत समाविष्ट होती. याच दिवसांतील आणखी एक बहुचर्चित जोडी म्हणजे सैफ अली खान आणि अमृता सिंग. या दोन्ही कलाकारांमध्ये असणारे वयाचे अंतर आणि दोघांच्याही कारकिर्दीमध्ये असणारी दरी पाहता त्यांचे प्रेम फार काळ टिकणार नाही असेच अनेकांना वाटत होते. पण, तेरा वर्षांच्या वैवाहिक आयुष्यात सैफ आणि अमृताने नेहमीच एकमेकांना साथ देत अनेकांचे अंदाज चुकीचे ठरवले होते. पिंकव्हिलाने प्रसिद्ध केलेल्या वृत्तानुसार आणि बऱ्याच बी टाऊन चर्चांनुसार सैफ आणि अमृताचे लग्न हा विषय अनेक ठिकाणी चर्चिला जात होता. इतकेच नव्हे तर एका मासिकाच्या मुखपृष्ठावरही सैफ आणि अमृताच्या या प्रेमकहाणीची झलक पाहायला मिळाली होती. 'मुव्ही' या मासिकाच्या १९९१ च्या नोव्हेंबर महिन्यातील आवृत्तीवर 'मोस्ट कॉन्ट्रोव्हर्शिअल लव्ह स्टोरी ऑफ १९९१' असे म्हणत अमृता आणि सैफची प्रेमकहाणी सर्वांसमोर आणली होती. या मासिकाच्या मुखपृष्ठावर सैफ आणि अमृताचा एक फोटोदेखील पाहायला मिळाला होता. सैफ आणि अमृतामध्ये वयाचे इतके अंतर असल्यामुळे त्याच विषयावरुन बऱ्याच चर्चा रंगल्याचे पाहायला मिळाले होते. सैफचे आई-वडिल म्हणजेच शर्मिला टागोर आणि मन्सूर अली खान पतौडी यांचा या लग्नासाठी विरोध असतानाही सैफ आणि अमृताने ऑक्टोबर १९९१ मध्ये लग्नगाठ बांधली होती. १९९९ ला सिमी गरेवाल यांच्या प्रसिद्ध चॅट शोमध्ये या सेलिब्रिटी जोडप्याच्या नात्याविषयीच्या बऱ्याच गोष्टी उघड झाल्या होत्या. 'मी माझ्यापेक्षा वयाने लहान असलेल्या मुलाशी लग्न करेन अशी कल्पनाही केली नव्हती', असा खुलासा अमृताने या कार्यक्रमात केला होता. या दोघांचेही एकमेकांवर असणारे प्रेम पाहता त्यांच्या नात्याचा पाया भक्कम आहे असे वाटत असतानाच त्यांच्या नात्यात दुरावा आला. २००४ मध्ये सैफ-अमृताचा घटस्फोट झाला आणि त्यानंतर अमृताने चित्रपटसृष्टीतून काढता पाय घेतला. सध्याच्या घडीला या दोन्ही कलाकारांच्या वाटा वेगळ्या असून आपआपल्या आयुष्यात हे दोघेही आनंदी असल्याचे पाहायला मिळत आहे. सैफने अभिनेत्री करिना कपूरशी लग्न केले असून काही दिवसांपूर्वीच त्यांच्या जीवनात तैमुर या त्यांच्या मुलाचेही आगमन झाले आहे. अमृतासुद्धा सध्या तिच्या मुलांच्या संगोपनावर आणि बॉलिवूड पदार्पणावर लक्ष देत आहे.
