आयुषमानच्या भावाला होऊ शकतो तुरुंगवास

अपारशक्तीवर काय आहे आरोप
ऑक्टोबर महिन्याच्या शेवटी मुंबईच्या आंतरराष्ट्रीय विमानतळावरुन तो बाहेरगावी जात होता. तेव्हा त्याला सीआयएसएफच्या (CISF) कर्मचाऱ्यांनी ओळख विचारली. यावर अपारशक्तीने त्यांच्यासोबत मारहाण केली. एवढेच नाही तर जेव्हा त्याला रोखण्यात येत होते, तेव्हा तो पळून जाण्याचा प्रयत्न करत होता. पण विमानतळावरील प्रवाशांच्या मदतीने त्याला पकडण्यात आले आणि त्याला सहारा पोलिसांकडे सुपूर्त करण्यात आले.

आयुषमानने केला होता जामीन
सहारा पोलिसांनी अपारशक्तीच्या विरोधात, गणवेशात असलेल्या सुरक्षा रक्षकांना मारहाण, धमकी देणे यासारखे गुन्हे दाखल करुन अटक केले होते. यानंतर न्यायालयाने त्याला एका दिवसाची पोलिस कोठडीही सुनावली होती. पहिल्यांदा अपारशक्ती आपल्याबाबत माहिती देण्यास तयार नव्हता पण नंतर त्याने आपली संपूर्ण माहिती दिली. भावाच्या अटकेची बातमी बाहेर येऊ नये म्हणून आयुषमान स्वतः दोन दिवस पोलिस स्थानकात थांबलेला. पण एका दिवसाची पोलिस कोठडी पूर्ण झाल्यानंतर आयुषमानने आपल्या भावाची जामीनावर सुटका केली. याशिवाय ही गोष्ट प्रसारमाध्यमांपर्यंत पोहचता कामा नये अशी पोलिसांकडे विनवणीही केली. कारण त्याने तो एका मोठ्या बॅनरच्या सिनेमासाठी करारबद्ध झाला होता. जर ही बातमी बाहेर आली असती तर कदाचित त्याच्या हातून तो सिनेमाही गेला असता.

बॉलिवूड भास्कर या संकेतस्थळाने दिलेल्या वृत्तानुसार, ही घटना ऑक्टोबरच्या शेवटच्या आठवड्यातील आहे. अपारशक्ती विमानतळावर उशिरा आला होता आणि त्याला आत जायचे होते. तिथे उपस्थित असलेल्या सुरक्षा रक्षकांनी जेव्हा त्याला त्याचे ओळखपत्र विचारले तेव्हा, मी एक अभिनेता आहे तुम्ही माझ्याकडे ओळखपत्र कसे मागू शकता असा प्रतिप्रश्न केला. यानंतर त्याने मारामारी करायला सुरुवात केली.

३ ते ५ वर्षांची शिक्षा
सध्या अपारशक्ती विरोधात आरोपपत्र दाखल करण्यात आले आहे. यासाठी अपारशक्तीला न्यायालयात हजर राहण्यासही सांगण्यात आले आहे. जर या घटनेत अपारशक्ती दोषी ठरला तर त्याला ३ ते ५ वर्षांची शिक्षा होऊ शकते.