प्रसिद्ध अभिनेता गोविंदा आणि त्याची डान्स स्टाइल ही आजही तरुणांमध्ये लोकप्रिय आहे. कोणत्याही गाण्यावर आपल्याच अंदाजात ताल धरत मनमुरादपणे डान्स करण्याची त्याची स्टाइल अनेकांना वेड लावून जाते. त्यामुळे आजही त्याच्यावर चित्रित झालेली गाणी प्रेक्षकांच्या मनावर कोरली गेली आहेत. अलिकडेच गोविंदाने त्याचा ५७ वा वाढदिवस सेलिब्रेट केला. विशेष म्हणजे या बर्थ डे सेलिब्रेशनमध्ये पुन्हा एकदा गोविंदाचा डान्सची झलक पाहायला मिळाली. मात्र, यावेळी त्याच्यासोबत त्याच्या पत्नीनेदेखील ताल धरला. 'विरल भयानी' यांच्या इन्स्टाग्राम पेजवर गोविंदाच्या बर्थ डे पार्टीचा व्हिडीओ शेअर करण्यात आला आहे. या व्हिडीओमध्ये गोविंदाने 'हीरो नंबर 1', 'कुली नंबर 1' या चित्रपटांमधील गाण्यांवर ताल धरला आणि यात त्याला साथ मिळाली ती त्याच्या पत्नीची. सध्या गोविंदा आणि त्याच्या पत्नीचा हा डान्स व्हिडीओ सोशल मीडियावर चांगलाच चर्चेत आला असून व्हायरल होत आहे. View this post on Instagram A post shared by Viral Bhayani (@viralbhayani) दरम्यान, गोविंदाने आयोजित केलेल्या पार्टीमध्ये कलाविश्वातील अनेक दिग्गजांनी हजेरी लावली होती. यावेळी अभिनेता शक्ती कपूर, नृत्य दिग्दर्शक गणेश आचार्य यांनीदेखील त्यांच्या स्टाइलमध्ये डान्स केला. गोविंदा हा बॉलिवूडमधील लोकप्रिय अभिनेता असून त्याचे 'राजा बाबू', 'दुल्हे राजा', 'बडे मियाँ छोटे मियाँ', 'कुली नंबर 1', 'हीरो नंबर 1', 'हसीना मान जाएगी' हे चित्रपट तुफान गाजले आहेत.