शाहिद कपूरचा बॉलीवूड प्रवेश झाल्यानंतर काही काळातच तो तरुणाईच्या गळ्यातील ताईत झाला होता. त्याची ‘चॉकलेट बॉय’ ही प्रतिमा आजपर्यंत अधिक लोकप्रिय राहिली आहे. हे खरे असले तरी सुरुवातीच्या काही चित्रपटांनंतर त्याने आपल्या भूमिकांची निवड बदलली. अधिक आव्हानात्मक चित्रपट आणि उत्तम दिग्दर्शकांच्या चित्रपटातून काम करत त्याने स्वत:ला सिद्ध केले. आज शाहिद चित्रपटांबरोबरच ओटीटी विश्वातही धुमाकूळ घालत आहे. सध्या शाहिद त्याच्या आगामी 'ब्लडी डॅडी' या चित्रपटामुळे चर्चेत आहे. या चित्रपटाच्या निमित्ताने त्याने 'ह्युमन्स ऑफ बॉम्बे' या यूट्यूब चॅनलला मुलाखत दिली. या मुलाखतीमध्ये त्याला कोणते पात्र पुन्हा साकारायला आवडेल याबद्दल खुलासा केला आहे. आणखी वाचा : "बरेच मराठी शब्द हे फारसी भाषेतील" नसीरुद्दीन शाह यांचा मोठा खुलासा; म्हणाले, "छत्रपती शिवाजी महाराज…" या प्रश्नाचे उत्तर देताना त्याने 'पद्मावत' चित्रपटातील पात्राचा उल्लेख केला. तो म्हणाला, "मला महारावल रतन सिंग ही भूमिका पुन्हा साकारायला आवडेल. त्या भूमिकेतील माझे काम मला स्वतःला अजिबात आवडलेले नाही. त्या भूमिकेसाठी मी माझ्याकडून काहीच खास असे देऊ शकलो नाही. विचारांत मी गुरफटून गेलो होतो. लोकांना ती भूमिका आवडली असेल कदाचित, पण मला त्यातील माझे काम आवडलेले नाही." मध्यंतरी एका मुलाखतीदरम्यान शाहिदने 'पद्मावत'च्या सेटवर तो आऊटसाइडर असल्यासारखे वाटायचे, असाही खुलासा केला होता. नुकतेच शाहिदने 'फर्जी' या वेब सीरिजमधून ओटीटी विश्वात पदार्पण केले आणि यातील शाहिदचे काम लोकांना पसंत पडले. आता अली अब्बास जफरसह तो 'ब्लडी डॅडी'मधून पुन्हा एका वेगळ्या भूमिकेत आपल्याला दिसणार आहे.
