सेलिब्रिटी क्रश : ‘माझं हे गुपित कोणालाच माहित नाही’

मला त्यावेळी तिच्यात सुंदर आणि निरागस मुलगी दिसली होती. माझ्या मनातील तिची ही छबी आजही तशीच कायम आहे. मी आणि पुर्णिमा एकाच शाळेत होतो. पण, ती माझ्यापेक्षा दोन वर्षांनी लहान असल्यामुळे आमचे वर्ग वेगळे होते. त्यामुळे वर्गात समोरासमोर बाकांवर बसून नजरानजर होण्याची संधी आम्हाला मिळाली नाही. त्यामुळे कधीतरी शाळेच्या आवारात ती दिसली की मी तिच्याकडे पाहत बसायचो. ती संस्कृत शिकण्यासाठी एका क्लासला जायची. योगायोगाने मीसुद्धा त्याच क्लासला जात होतो. पण आमच्या वेळा वेगवेगळ्या होत्या. ऐरवी तिला कधी पाहायला मिळत नव्हते म्हणून तिच्यासोबत अधिकाधिक वेळ घालवण्यासाठी मी क्लासमध्ये माझी वेळ बदलून घेतली. मी अजून काही क्लासेस लावलेत असं खोट सांगून तिच्या बॅचमध्ये अॅडमिशन मिळवलं. त्यामुळे सगळ्यांना प्रश्न पडला की, हा ज्युनिअरच्या बॅचमध्ये कसं काय आला? पण मी फक्त तिच्यासाठी गेलो होतो.

नंतर शाळेतून बाहेर पडल्यानंतर तिचा आणि माझा काहीच संपर्क राहिला नाही. मी तिला तेव्हा कधी माझ्या मनातल्या भावना सांगितल्या नाहीत आणि तिच्या मनात माझ्याबद्दल काही होत का हेसुद्धा मला माहित नव्हतं. नंतर फेसबुक, बीबीएम आल्यानंतर अखेर २०१३ मध्ये ती मला पुन्हा भेटली. तेव्हा मी सर्व काही सांगून टाकलं. मी तुझ्यासाठी संस्कृतची बॅच बदलून घेतली होती असं सांगितल्यानंतर तिला आश्चर्याचा धक्का बसला. तिला यातलं काहीच माहित नव्हतं. खरंतर तिलाच काय पण माझ्या आई-वडिलांना, मित्रांनाही मी असं काही केलं होतं हे माहित नव्हतं. त्यामुळे आता सर्वांनाच माझं हे गुपित पहिल्यांदाच कळणार आहे. सोशल मीडियामुळे सिद्धार्थ आणि पुर्णिमाची रेशीमगाठ जुळल्याचं म्हटलं तर चुकीचं ठरणार नाही.

चैताली गुरव, chaitali.gurav@indianexpress.com