एखादा मोठा हिंदी चित्रपट प्रदर्शित होत असेल तर त्या आठवड्यात एकही मराठी चित्रपट प्रदर्शित होत नाही. कारण, अपेक्षित थिएटर्स आणि वेळा मिळत नाहीत. जेव्हा केव्हा एखादा सोयीचा आठवडा मिळतो, तेव्हा एक-दोन नव्हे तर चक्क पाच-सहा मराठी चित्रपट एकत्र प्रदर्शित होतात. त्यामुळे आशयघन आणि उत्तम सादरीकरण असूनही मराठी चित्रपटाला प्रेक्षक लाभत नाहीत. हिंदी समोर मराठी प्रेक्षकांसाठी उत्तम मराठी चित्रपटाचा पर्याय उभा करण्यापेक्षा आपआपसात भिडण्यात मराठी चित्रपटाचे निर्माते धन्यता मानत आहेत. शेवटी प्रेक्षक कुणाच्याच वाट्याला येत नाहीत आणि तिकीट बारीवर चित्रपट सपशेल आपटतो. यावर गांभिर्याने विचार करून आणि वितरण आणि प्रसिद्धीचा उत्तम पर्याय निवडून युनीट प्रोडक्शन ‘चरणदास चोर’ हा त्यांचा आगामी चित्रपट सलमान खानच्या ‘टायगर जिंदा है’ समोर प्रदर्शित करण्यास सज्ज झाले आहेत. येत्या २२ डिसेंबर रोजी ‘चरणदास चोर’ प्रदर्शित होत आहे.
वाचा : कतरिनाने सांभाळला आलियाच्या जीम ट्रेनरचा भार!
ऋषिकेश मुखर्जी आणि बासू चटर्जींसारख्या चित्रकर्मींच्या मार्मिक पण सहज विनोदाच्या शैलीचा प्रभाव असलेला ‘चरणदास चोर’चा पहिला पोस्टर नुकताच सोशल मीडियावर प्रदर्शित करण्यात आला. श्याम महेश्वरी यांचे लेखन-दिग्दर्शन आणि संजू होलमुखे यांचे क्रिएटीव्ह दिग्दर्शन असलेला ‘चरणदास चोर’ या चित्रपटाचा पहिलाच पोस्टर फार गमतीदार आहे. चित्रपटाचे नाव जरी चरणदास चोर असले तरी पोस्टरमध्ये तरी चोर कुठे दिसत नाही. त्याऐवजी एक पत्र्याची सुंदर रंगवलेली ट्रंक रेल्वेच्या रुळावर ठेवलेली दिसते. त्यामुळे चित्रपटातील हा चोर नक्की कोण याचीही उत्सुकता लागली आहे.
वाचा : ‘ते’ फोटो लीक करण्यामागे कंगनाचाच हात?
पोस्टरची रंगसंगती पाहून सिनेमाचा लूक एकदम फ्रेश असणार यात शंका नाही. त्यावर नमूद केलेल्या संत कबिरांच्या दोह्यामुळे चित्रपटाचा गाभा स्पष्ट होतो. त्यामुळे चित्रपटाबाबत उत्सुकता आणखीनच वाढली आहे. ‘चरणदास चोर’ हा टायगर…सलमानच्या तुलनेत लहान असला तरी प्रेक्षकांचे निखळ मनोरंजन करणारा ठरेल अशी अपेक्षा आहे.
