सिनेरसिक ख्रिस्तोफर नोलनच्या चित्रपटांची फारच आतुरतेने वाट पहात असतात. त्याच्या चित्रपटाची क्रेझ आपल्या भारतातही प्रचंड बघायला मिळते. नुकताचा त्याचा ‘ओपनहायमर’ हा चित्रपट प्रदर्शित झाला आहे. भारतात गेले काही दिवस या चित्रपटाची प्रचंड चर्चा होती. अणूबॉम्बचे जे. रॉबर्ट ओपनहायमर यांच्या जीवनावर हा चित्रपट बेतलेला आहे. ओपनहायमर यांनी हिंदू धर्मातील वेद आणि भगवद्गीतेचा प्रचंड अभ्यास केला होता, त्यासाठी ओपनहायमर संस्कृत शिकले होते. या चित्रपटाला पाहिल्याच दिवशी भारतात उत्तम प्रतिसाद मिळाला असून सर्व स्तरातून याचं कौतुक होत आहे. चित्रपटाने पहिल्याच दिवशी बॉक्स ऑफिसवर १३ ते १४ कोटींची कमाई केली. 'ओपनहायमर' हा भारतीय बॉक्स ऑफिसवर पहिल्या दिवशी जबरदस्त कमाई करणारा पहिला हॉलिवूड चित्रपट ठरला आहे. आणखी वाचा : बहुचर्चित 'टिपू' चित्रपट झाला डब्बाबंद, निर्मात्यांची मोठी घोषणा; पोस्टरमुळे निर्माण झालेला मोठा वाद नोलनच्या या चित्रपटाने ३ दिवसांत तब्बल ४९ कोटींचा व्यवसाय केला आहे. टॉम क्रुजच्या 'मिशन इम्पोसीबल ७' या चित्रपटाने ५ दिवसांत ६३ कोटींचा व्यवसाय केला होता. त्यामानाने 'ओपनहायमर' पुढच्या २ दिवसांत हा टप्पा पार करेल अशी शक्यता वर्तवली जात आहे. इतकंच नव्हे तर आयमॅक्स थिएटरमध्ये रात्री १२ आणि ३ वाजताचे शोजसुद्धा हाऊसफुल्ल आहेत. या चित्रपटातील भगवद्गीता वाचण्याच्या सीनवरुन थोडा वाद निर्माण झाला आहे. काही लोकांनी यासाठी आपल्या सेन्सॉर बोर्डला जवाबदार धरलं आहे. तो वादग्रस्त सीन लवकरात लवकर चित्रपटातून हटवण्याबद्दलही माहिती अन् सूचना प्रसारण मंत्री अनुराग ठाकूर यांनी दबाव आणल्याचं सांगितलं जात आहे. नोलनच्या या बहुचर्चित चित्रपटात ओपनहायमर यांची भूमिका अभिनेता सिलियन मर्फीने केली आहे. त्याच्याबरोबरच रॉबर्ट डाउनी ज्युनिअर, मॅट डॅमन, एमिली ब्लंट, रामी मलिक यांच्याही महत्त्वाच्या भूमिका आहेत.
