मनीषा कोईराला सध्या संजय दत्तचा बायोपिक संजी सिनेमाच्या प्रमोशनमध्ये व्यग्र आहे. या सिनेमात मनीषाने संजयच्या आईची म्हणजेच नर्गिस यांची व्यक्तिरेखा साकारली आहे. सिनेमाच्या प्रमोशनदरम्यान मनीषा म्हणाली की, आता तिला पुन्हा प्रेमात पडायचे नसून करिअरवर लक्ष केंद्रीत करायचे आहे. मनीषा म्हणाली की, 'आता मी या वयात आहे की प्रेम आणि नातेसंबंधांमुळे दुःख सहन करण्याची ताकद नाही. जगण्याची दुसरी संधी मिळाली असताना यापुढचे संपूर्ण आयुष्य मला करिअरसाठीच द्यायचे आहे.' यावेळी मनीषाने तिच्या आयुष्याचे सत्य सांगताना म्हटले की, तिच्या आजारपणातच मनीषाला जीवनाचं महत्त्व आणि सत्यता कळली. मनीषासोबतचा एक योगायोग म्हणजे मनीषाने कर्करोगाला मोठ्या धीराने लढा दिला. संजू सिनेमात तिने अभिनेत्री नर्गिस यांची व्यक्तिरेखा साकारली आहे. स्वतः नर्गिस यांचा कर्करोगाने मृत्यू झाला होता. मनीषाने संजू सिनेमातील तिच्या व्यक्तिरेखेबद्दल बोलताना म्हटले की, कर्करोगाचे उपचार घेत असताना झालेल्या शारिरीक आणि मानसिक यातना सहन केल्यानंतर पुन्हा एकदा त्या आठवणींना उजाळा देणं फार कष्टदायी होतं. पण नर्गिस यांची व्यक्तिरेखा साकारायला मिळाली यामुळेच मी हे सारं करण्याचं ठरवलं. येत्या २९ जूनला संजू सिनेमा सर्वत्र प्रदर्शित होत आहे.