स्वानंदी टिकेकरला ‘सुंदर मी होणार’चा ध्यास

नाटकाचा शुभारंभ पुलंच्या २५ व्या स्मृतिदिनी म्हणजेच गुरुवारी, १२ जून रोजी पुण्यात आणि शुक्रवारी १३ जून रोजी मुंबईत होणार आहे.

स्वानंदी सध्या हिंदीत ‘महानगर के जुगनू’ आणि इंग्रजीत ‘मिडल क्लास ड्रीम्स ऑफ समर नाईट’ या दोन नाटकांत भूमिका करते आहे. याआधी तिने ‘१०३’, ‘डोंट वरी बी हॅपी’ सारख्या लोकप्रिय नाटकांत काम केले होते. आता ‘सुंदर मी होणार’च्या निमित्ताने ती तीन वर्षांनी व्यावसायिक नाटकात काम करते आहे.

निर्माते आकाश भडसावळे यांनी फोन करून ‘सुंदर मी होणार’ हे नाटक करणार का? असं विचारलं तेव्हा इतकी सुंदर संहिता आणि पुलंचं नाटक म्हटल्यावर मी नाही म्हणूच शकणार नव्हते, असं तिने सांगितलं. स्वानंदीच्या मते या नाटकातील बेबीराजे ही व्यक्तिरेखा थोडीशी बंडखोर, मतस्वातंत्र्य असलेली आणि आत्मभान जपणारी, म्हणजे एकप्रकारे आजच्या काळाशी सुसंगत अशी आहे. त्यामुळे ती मला नेमकी माझ्यासारखी वाटते. जे आपल्याला सहज मिळालंय, त्याच्या पलीकडेही काही आहे का हे शोधण्याचा बेबीराजेंचा प्रयत्न आहे, त्यामुळे ती भूमिका मला अधिक भावली, असं स्वानंदी म्हणाली.

पुलंचं हे नाटक पाहिलं होतं, पण वाचलं नव्हतं, असं सांगतानाच त्यांनी लिहिलेल्या ओळी रंगमंचावर बोलता येणार हा अनुभवच आनंददायी असल्याचं ती सांगते. ‘ही केवळ एका घरातल्या मुलीची गोष्ट नाही. ती नव्या विचारांची, सामाजिक चौकटी मोडण्याच्या प्रयत्नांची गोष्ट आहे. आजची तरुणाई ज्या संघर्षांमधून स्वत:चं वेगळं स्थान शोधते, त्याच दिशेचा प्रवास या व्यक्तिरेखेचा आहे. म्हणून ही भूमिका आपल्यासाठी महत्त्वाची आहे’ असं ती सांगते. या नाटकाचं दिग्दर्शन राजेश देशपांडे करणार आहेत. त्यांनी यापूर्वीही पु. ल. देशपांडे यांच्या ‘ती फुलराणी’चं दिग्दर्शन केलं आहे. नाटकाची निर्मिती करण देसाई आणि आकाश भडसावळे यांनी केली आहे. नाटकात स्वानंदी (बेबीराजे) सोबत आस्ताद काळे (संजय), शृजा प्रभुदेसाई (दीदीराजे) यांसारखे कसलेले कलाकार काम करत आहेत. याशिवाय, सृजन देशपांडे, श्रुती पाटील, निलेश दातार ही नट मंडळी साहाय्यक भूमिकांतून दिसणार आहेत.