जस्टिन बिबरच्या सुरक्षेसाठी ‘भाईजान’चा खास अंगरक्षक तैनात

जस्टिन बिबरसारख्या कलाकाराच्या सुरक्षेची जबाबदारी आपल्या खांद्यावर सोपवण्यात आल्याबद्दल शेराने आनंद व्यक्त केला आहे. हा माझ्यासाठी सन्मान आहे. माझ्या कामाची संपूर्ण पडताळणी केल्यानंतर आंतरराष्ट्रीय सुरक्षा एजंट्सकडून माझी निवड करण्यात आली. आंतरराष्ट्रीय कलाकार संघटनेकडून समंथा टोझवोलोझ यांनी काही दिवसांपूर्वी मुंबईत शेराची भेट घेतली होती. यावेळी त्यांनी शेराची मुलाखत घेतली होती. या मुलाखतीनंतर जस्टिनच्या सुरक्षेची जबाबादीर शेराकडे सोपवण्याचा निर्णय घेण्यात आला. शेरा त्याच्या कामात सर्वोत्कृष्ट आहे. त्याची प्रसंगावधानता वाखाणण्याजोगी आहे. त्यामुळे त्याला भेटताक्षणी तो जस्टिनच्या सुरक्षेसाठी योग्य व्यक्ती असल्याची जाणीव झाल्याचे समंथा टोझवोलोझ यांनी सांगितले. दरम्यान, शेराने आयोजकांनी जस्टिनच्या सुरक्षेसाठी आखलेल्या योजनेचे कौतुक केले आहे. जस्टिनच्या सुरक्षेसाठी इतकी अभेद्य आणि सूक्ष्म पद्धतीने आखलेली योजना पाहून मी प्रभावित झालो आहे. ही माझ्या आजपर्यंतच्या कारकिर्दीतील सर्वात आव्हानात्मक कामगिरी असेल, असेही शेराने म्हटले आहे.

शेरा मागील१८ वर्षापासून सलमानचा अंगरक्षक म्हणून कार्यरत आहे. तब्बल अठरा वर्षांपासून सलमानसोबत सावलीप्रमाणे संरक्षण देणाऱ्या गुरपीतला (शेरा) सलमान आपल्या परिवारातील एक सदस्यच मानतो. सलमान कोणत्याही ठिकाणी जाणार असेल त्यापूर्वी एक दिवस अगोदर शेरा त्या जागेची पाहणी करतो. यासाठी त्याने बऱ्याचदा चार ते पाच किलोमीटरचा परिसर पायी पालथा घातला आहे.