…म्हणून शाहरुखने ‘दंगल’बद्दल अजूनपर्यंत अवाक्षरही काढलं नाही

आमिरच्या या सिनेमाचे सलमान खाननेही कौतुक केले आहे, पण बॉलिवूडच्या किंग खानने मात्र या सिनेमाबद्दल एक अवाक्षरही अजूनपर्यंत काढले नाही. आमिरने एका मुलाखतीत असे म्हटले की, मला वाटतं की शाहरुखने आतापर्यंत हा सनेमा पाहिला नसेल, मला त्याचा फोनही अजूनपर्यंत आलेला नाही.

तर दुसरीकडे शाहरुखलाही एका ट्विटर युझरने ‘दंगल’ हा हा सिनेमा कसा वाटला असा प्रश्न केला तेव्हा शाहरुखने उत्तर देताना म्हटले की, ‘माझ्या कामांमध्ये मी व्यग्र असल्यामुळे अजूनपर्यंत हा सिनेमा पाहू शकलो नाही.’ नंतर तो हेही म्हणाला की, ‘मी सध्या अनेकांकडून या सिनेमाबद्दल कौतुकच ऐकतो आहे. त्यामुळे हा सिनेमा लवकरात लवकर बघण्याचा मी प्रयत्न करेन. आमिरने, शाहरुखच्या या व्यक्तव्याचे स्वागत करत म्हटले की, ‘शाहरुखला हा सिनेमा कसा वाटतो हे जाणून घेण्यासाठी मी फार उत्सुक आहे.’

भारतात २३ डिसेंबरला प्रदर्शित झालेल्या ‘दंगल’ या सिनेमाला प्रेक्षकांनी भरभरुन प्रतिसाद दिला आहे. प्रदर्शित झालेल्या दिवसापासूनच आमिरच्या या सिनेमाने बॉक्स ऑफिसवरील एक एक विक्रम मोडित काढायला सुरुवात केली होती. सलमान खानच्या ‘बरजरंगी भाईजान’ या सिनेमाचा विक्रम मोडित काढत आमिरच्या ‘दंगल’ने ‘पीके’ या सिनेमालाही भारतातील कमाईच्या बाबतीत मागे टाकले आहे. सध्याच्या घडीला ‘दंगल’ हा सिनेमा आतापर्यंतच्या हिंदी सिनेमांमधील सर्वाधिक कमाई करणारा सिनेमा ठरला आहे. महावीर सिंग फोगट आणि त्यांच्या मुलींच्या कुस्तीपटू होण्याच्या प्रवासावर बेतलेल्या या सिनेमाने सर्वात जलद ३५० कोटी रुपयांची कमाई केली आहे.

काही दिवसांपूर्वीच आमिरने हे स्पष्ट केले होते की, त्याला बॉक्स ऑफिस कमाईचे आकडे जास्त महत्त्वाचे नाहित. ‘मी कमाईच्या आकड्यापेक्षा प्रेक्षकांच्या प्रतिक्रियांना जास्त महत्त्व देतो. मला त्या आकड्यांमध्ये काहीही रस नाही. प्रेक्षकांची मनं जिकणं हाच माझ्या चित्रपटांचा मुख्य हेतू असतो’, असे आमिर ‘आएएनएस’ला दिलेल्या मुलाखतीत म्हणाला होता.