उत्तम विनोदशैली आणि अभिनय यांच्या जोरावर विनोदवीर सुनील ग्रोवरने आजपर्यंत प्रेक्षकांचं मनोरंजन केलं आहे. कधी ‘गुत्थी’ होऊन तर कधी ’डॉक्टर गुलाटी’ आणि ‘संतोष भाभी’ होऊन त्याने प्रेक्षकांना अविरतपणे हसवलं आहे. विशेष म्हणजे द कपिल शर्मा शोमधील सुनीलची गुत्थी ही भूमिका प्रेक्षकांना मनापासून आवडते. मात्र ही कार्यक्रमात स्त्री भूमिका करु नका असं सुनीलच्या मुलाने त्याला सांगितलं होतं. एका मुलाखतीत सुनीलने याविषयी भाष्य केलं आहे. "माझा मुलगा मोहन आता सहा वर्षांचा आहे. पण दोन-तीन वर्षांपूर्वी जेव्हा माझी गुत्थी ही भूमिका प्रचंड गाजली होती. त्यावेळी बिल्डींगमध्ये राहणाऱ्या लहान मुलांनी त्याला प्रचंड चिडवलं होतं. तुझे बाबा मुलगी होतात असं ती मुलं मोहनला सतत चिडवायचे. या चिडवण्याला कंटाळून मोहन एक दिवस माझ्याजवळ आला आणि ती मुलीची भूमिका तुम्ही करु नका असं सांगितलं. त्यावर मी कारण विचारलं तर, त्यावर त्याने कारण न देता फक्त करु नका इतकंच सांगितलं", असं सुनील म्हणाला. पुढे तो म्हणतो, "मोहनने मला भूमिका करण्यास मनाई का केली हे मला बिल्डींगमधील लोकांकडून समजलं. त्यानंतर मी मुद्दाम एकदिवस मोहनला घेऊन मॉलमध्ये गेलो. त्यावेळी गुत्थी आल्याचं पाहिल्यावर नागरिकांनी आमच्याभोवती प्रचंड घोळका केला. त्याचवेळी अनेक जण माझ्यासोबत फोटो काढत होते. या घटनेनंतर माझ्या मुलाला जाणीव झाली की मी नेमकं काय काम करतोय. त्यावेळी मी मुलाला इतकंच सांगितलं की, या सगळ्या लोकांच्या चेहऱ्यावर आम्ही हसू आणतो आणि ही चांगली गोष्ट आहे". दरम्यान, सुनील ग्रोवर छोट्या पडद्यावरील लोकप्रिय विनोदवीर आहे. केवळ छोटा पडदाच नाही तर सुनीलने मोठ्या पडद्यावरही काम केलं आहे. अभिनेता सलमान खानच्या 'भारत' या चित्रपटात तो झळकला होता.
