छोट्या पडद्यावर ‘पवित्र रिश्ता’, तर रुपेरी पडद्यावर ‘काइ पो चे’ या चित्रपटांच्या माध्यमातून अभिनयाचं खणखणीत नाणं वाजवणारा अभिनेता म्हणजे सुशांत सिंह राजपूत. सुशांतचं निधन होऊन खरं तर बराच काळ लोटला आहे. मात्र, त्याच्या आठवणी आजही चाहत्यांच्या मनात ताज्या आहेत. काइ पो चे या चित्रपटामुळे सुशांतला नवीन ओळख मिळाली. आणि तो तुफान लोकप्रिय झाला. सुशांतला प्रसिद्धीझोतात आणणाऱ्या या चित्रपटाला नुकतीच ८ वर्ष पूर्ण झाली आहेत. 'काइ पो चे' या चित्रपटाला ८ वर्ष झाल्याच्या निमित्ताने पुन्हा एकदा चाहते आणि चित्रपटातील कलाकार सुशांतच्या आठवणींना उजाळा देत असल्याचं पाहायला मिळत आहे. यात दिग्दर्शक अभिषेक कपूर यांनी सोशल मीडियाच्या माध्यमातून सुशांतसाठी एक खास पोस्ट शेअर केली आहे. The thrill of starting this journey with a new team hungry 2 give their best at the dawn of their careers stands most vividly in mind..One cant quantify the love our film continues to receive over the years, neither can we quantify the pain we feel at the loss of our crown jewel pic.twitter.com/oTvhal9UOu — Abhishek Kapoor (@Abhishekapoor) February 22, 2021 "आपल्या करिअरची सुरुवात करणाऱ्या नव्या कलाकारांसोबत काम करण्याचा अनुभव खूप निराळा होता. या चित्रपटाने गेल्या काही वर्षात जे प्रेम मिळवलंय, त्याला कोणतीच सीमा नाही. तसंच लाडका अभिनेता सोडून गेल्याच्या दु:खालाही सीमा नाही", अशी पोस्ट अभिषेक कपूर यांनी केली आहे. दरम्यान, 'काइ पो चे' हा चित्रपट २०१३ साली प्रेक्षकांच्या भेटीला आला होता. या चित्रपटात सुशांत सिंह राजपूत मुख्य भूमिकेत झळकला होता. त्याच्यासोबत अमित साद, राजकुमार यादव हे कलाकारदेखील महत्त्वपूर्ण भूमिकेत झळकले होते. तीन मित्रांच्या भोवती फिरणारा हा चित्रपट तुफान लोकप्रिय ठरला.
