.आणि अखेर तो क्षण आला. स्वामिनी मालिकेतील छोट्या रमाबाई आता मोठ्या झाल्या आहेत. लॉकडाउननंतर आता हळूहळू मालिकांचे चित्रीकरण सुरु झाले आहे. त्यासाठी सरकारने काही नियमही आखले आहेत. त्यामुळे आता मालिकांमध्ये काही तरी वेगळे पाहायला मिळणार असल्यामुळे प्रेक्षक उत्सुक आहेत. कलर्स मराठी वाहिनीवरील 'स्वामिनी' या मालिकेचे देखील चित्रीकरण सुरु झाले आहे. या मालिकेचे नवे भाग २१ जुलै पासून प्रेक्षकांच्या भेटीला येणार आहे. 'स्वामिनी' मालिकेच्या चित्रीकरणास सुरुवात करण्याआधी जवळपासचा परिसर, मेकअप रूम्स आणि सेटचे सॅनेटायझेशन करण्यात आले. येत्या भागांमध्ये प्रेक्षकांसाठी एक खास सरप्राईज असणार आहे. निरागसपणे वाड्यात बागडत, हसण्याने सार्‍यांना मोहात पाडत आणि पेशवाई संस्कारात घडत असलेल्या आपल्या रमाबाई मोठ्या झाल्या आहेत. मोठ्या रमेच्या पावलांनी आता शनिवारवाडा उजळणार आहे. मोठ्या रमाबाईंची भूमिका कोण साकारणार याची उत्सुकता शिगेला पोहचली आहे. रमा एका सामान्य घरात वाढलेली निरागस मुलगी जिच्या नशिबी पेशवीणबाई होण्याचे थोर भाग्य आले. आता ती भावी काळात येणार्‍या जबाबदार्‍या कशी पार पाडेल? माधवराव आईच्या विरोधात जाऊन तिला कशी साथ देतील? रमा आणि माधव यांचा हा प्रवास कसा होता? त्यांना कोणाची साथ लाभली? हे पाहण्यासाठी प्रेक्षक उत्सुक आहेत.
