'झी मराठी' वाहिनीवरील 'पारू' ही मालिका अल्पावधीतच प्रेक्षकांच्या पसंतीस उतरली आहे. या मालिकेतील प्रत्येत पात्राला सध्या घरोघरी पसंती मिळत असल्याचं पाहायला मिळत आहे. 'पारू' मालिकेत अभिनेत्री शरयू सोनावणे आणि अभिनेता प्रसाद जवादे यांनी प्रमुख भूमिका साकारल्या आहेत. तसेच यामधील अहिल्यादेवींचं पात्र सुद्धा अत्यंत महत्त्वाचं आहे. कारण, त्यांच्याभोवती मालिकेचं संपूर्ण कथानक फिरतं. अहिल्यादेवी किर्लोस्कर ही वजनदार भूमिका अभिनेत्री मुग्धा कर्णिक साकारत आहे. ‘पारू’ मालिकेचं संपूर्ण कथानक अहिल्यादेवी किर्लोस्कर यांचं बलाढ्य साम्राज्य आणि गावाकडून आलेली साधीभोळी ‘पारू’ यावर आधारित आहे. अलीकडच्या काळात अनेक कलाकार सोशल मीडियावर व्यक्त होत असतात. विविध सामाजिक व राजकीय विषयांवर हे कलाकार उघडपणे भाष्य करतात. अगदी त्याचप्रमाणे अभिनेत्री मुग्धा कर्णिक देखील सोशल मीडियावर कायम सक्रिय असते. तिच्या वैयक्तिक जीवनात येणारे अनुभव, शूट डायरीज ती इन्स्टाग्राम स्टोरीजवर शेअर करत असते. मुग्धाने नुकत्याच शेअर केलेल्या एका इन्स्टा स्टोरीने सध्या सर्वांचं लक्ष वेधून घेतलं आहे. यामध्ये अभिनेत्रीने एका नामांकित बँकेबद्दल संताप व्यक्त केला आहे. एटीएम (ATM) मधून पैसे काढल्यावर फाटलेल्या नोटा आल्या असं तिने या पोस्टमध्ये म्हटलं आहे. तसेच या पोस्टसह तिने एक फोटो देखील शेअर केला आहे. हेही वाचा : Video : ‘मैं कोल्हापूर से आयी हूँ’, माधुरी दीक्षितसह अंकिता लोखंडेचा जबरदस्त डान्स; म्हणाली, “मॅम मी तुमची…” मुग्धा कर्णिकची पोस्ट चर्चेत मुग्धा कर्णिकने तिच्या पोस्टमध्ये फाटलेल्या नोटांचा फोटो शेअर केला आहे. अभिनेत्री लिहिते, "एका नामांकित बँकेच्या एटीएममधून आज अशाप्रकारच्या नोटा आल्या. याबद्दल त्यांच्याकडे तक्रार किंवा विचारणा करायची असल्याला तर, कस्टमर केअर नंबर सुद्धा सुरू नाही. आता ही समस्या मी कशी सोडवू? त्यांना फोन केल्यावर तक्रार निवारण करण्याचे विशिष्ट विभाग असतात त्याच तुमची समस्या समाविष्ट नसेल तर पुढे काहीच होत नाही. #needtochangemybank (मला बँक बदलण्याची गरज आहे)" हेही वाचा : श्रीदेवी यांच्या स्मरणार्थ मुंबई महापालिकेचा मोठा निर्णय; लोखंडवाला कॉम्प्लेक्सच्या जंक्शनला देणार दिवंगत अभिनेत्रीचं नाव मुग्धा कर्णिकची इन्स्टाग्राम पोस्ट दरम्यान, 'पारू' मालिकेत काम करण्याआधी मुग्धा 'झिम्मा', 'स्वाभिमान', 'होम स्वीट होम' या मालिकांमधून तर, रंगभूमीवर काही नाटकांमधून प्रेक्षकांच्या भेटीला आली आहे. आता सध्या ती साकारत असलेल्या अहिल्यादेवींच्या भूमिकेने प्रेक्षकांच्या मनावर एक वेगळी छाप उमटवली आहे.
