मराठी रंगभूमीवर सतत विविध प्रकारचे प्रयोग होत असतात. अनोखे विषय असलेली नाटके प्रेक्षकांच्या भेटीस येतात. असेच एक नवीन नाटक प्रेक्षकांच्या भेटीस येत आहे. या नाटकाचा टिझर व्हायरल झाला असुन त्यात प्रसाद ओक प्रशांत दामले यांना भूमिकाच नाकारताना दिसतोय. तू २२ वर्षांचा वाटतोस त्यामुळे तू नकोच असं प्रसाद ओक म्हणतो आणि त्यावर प्रशांत दामले म्हणतात 'तू म्हणशील तसं'. मराठी अभिनयसृष्टीतील प्रसिद्ध अभिनेते प्रशांत दामले आणि प्रसाद ओक या नाटकात प्रमुख भूमिका सादर करताना दिसणार आहेत. या नाटकाचे नावच आहे 'तु म्हणशील तसं'. नाटकाची कथा काय?, इतर कलाकार कोण आहेत? व हे नाटक कधीपासून प्रेक्षकांच्या भेटीस येणार याबाबत अद्याप कुठलीही अधिकृत माहिती जाहीर केली गेलेली नाही. प्रसादने नुकतेच मराठी रंगभूमी दिनानिमित्त फेसबुकवर एक पोस्ट शेअर केली होती. या पोस्टमध्ये त्याने एक व्हिडीओ शेअर करुन या नाटकाबाबत प्रेक्षकांना माहिती दिली. प्रसादने अलिकडेच 'वाडा चिरेबंदी' आणि 'मग्न तळ्याकाठी' या नाटकांमध्ये काम केले होते तर प्रशांत दामले यांचे 'एका लग्नाची पुढची गोष्ट' हे नाटक रंगभूमीवर चांगलेच गाजतेय. या दोघांकडेही अभिनयाचा प्रचंड अनुभव आहे. त्यांनी नाटक, मालिका आणि चित्रपट या तिन्ही माध्यमांतून प्रेक्षकांचे मन जिंकले आहे. त्यामुळे प्रेक्षक आता 'तु म्हणशील तसं' या आगामी नाटकाची आतुरतेने वाट पाहात आहेत.
