मुंबई : घरातील झोपाळ्यावर झोका घेताना दोरीचा फास बसून शनिवारी अंधेरी येथे एका नऊ वर्षांच्या मुलाचा मृत्यू झाला. याप्रकरणी पोलिसांनी अपमृत्यूची नोंद केली असून घातपाताची शक्यता तूर्त फेटाळली आहे. अंधेरीच्या गावदेवी डोंगर परिसरातील कामा रोड येथील झोपडपट्टीत शनिवारी सायंकाळी सहाच्या सुमारास ही दुर्घटना घडली. मृत मुलाचे नाव ईस्माईल आघा असे होते. आई वडील आणि दोन भावंडांसह राहत होता. घरात दोरीच्या साहाय्याने बनवण्यात आलेल्या झोपाळ्यावर ईस्माईल झोका घेत होता. त्याची आई बाजूच्या खोलीमध्ये झोपली होती. त्याची बहीण खोलीत आली असता ईस्माईलला फास बसल्याचे तिने पाहिले. तिने हा प्रकार आईला सांगितला. आईने ईस्माईलला जवळच्या रुग्णालयात दाखल केले असता तेथील डॉक्टरांनी ईस्माईलला मृत घोषित केले.
