आंतरराष्ट्रीय दर्जाचे शिक्षण देण्याचा संकल्प

मुंबई महापालिकेच्या शिक्षण विभागाचा २०२२-२३ या आर्थिक वर्षांचा ३,३७० कोटी रुपयांचा अर्थसंकल्प बुधवारी सह आयुक्त अजित कुंभार यांनी शिक्षण समिती अध्यक्ष संध्या दोशी यांना सादर केला.

मैदानांचा विकास आणि क्रीडा संकुलांची निर्मिती करण्याची घोषणाही अर्थसंकल्पात करण्यात आली आहे. आगामी वर्षांत मुंबईमधील शाळांच्या २० मैदानांचा विकास करण्यात येणार आहे. पहिल्या टप्प्यात दोन मैदानांच्या विकासाची कामे सुरू असून उर्वरित १८ मैदानांचा टप्प्याटप्प्याने विकास करण्याचा प्रशासनाचा मानस आहे. मध्यवर्ती ठिकाणी मैदानी खेळांबरोबरच इनडोअर खेळांसाठी आंतरराष्ट्रीय दर्जाची क्रीडा संकुले उभारण्याची घोषणाही अर्थसंकल्पात करण्यात आली आहे. मुंबईतील गरीब कुटुंबामधील विद्यार्थ्यांना आंतरराष्ट्रीय दर्जाचे शिक्षण मिळावे यासाठी पालिकेने सीबीएसई, आयसीएसई मंडळाच्या १२ शाळा सुरू केल्या असून आता केंब्रिज विद्यापीठाशी संलग्न आयजीएसई, आयबी मंडळाच्या शाळाही सुरू करण्यात येणार असल्याची घोषणा अर्थसंकल्पात करण्यात आली आहे. केवळ घोषणाच नव्हे तर या शाळांसाठी १५ कोटी रुपयांची तरतूदही अर्थसंकल्पात करण्यात आली आहे.

विद्यार्थ्यांना डिजिटल शिक्षण देण्याचा मानस अर्थसंकल्पात व्यक्त करण्यात आला असून त्यासाठी पालिका शाळांतील १,२१४ वर्ग डिजिटल करण्यात आले आहे. आता १,३०० वर्गासाठी एलईडी इंटरअ‍ॅक्टीव्ह पॅनल तयार करण्यात येणार आहे. भविष्यात सर्व ७,९३४ वर्ग डिजिटल करण्यात येणार आहेत. यासाठी २७ कोटी रुपयांची तरतूद करण्यात आली आहे. खगोल घडामोडींचे ज्ञान व त्याविषयातील जिज्ञासू वृत्ती वाढविण्यासाठी २५ खगोलीय प्रयोगशाळा प्रायोगिक तत्वावर स्थापन करण्याचा संकल्पही अर्थसंकल्पात सोडणार आला आहे.

जेटकुल जेल अग्निशमन यंत्रांचीही खरेदी

* पालिका शाळा आणि विद्यार्थ्यांच्या सुरक्षेमुळे शालेय इमारतींसाठी अग्निशमन यंत्रे उपलब्ध करण्यात आली आहेत. पालिका शाळांतील वर्गखोल्या, विज्ञान प्रयोगशाळा, संगणक प्रयोगशाळा, कार्यालय इत्यादी ठिकाणी वापर करण्यासाठी काही शाळांमध्ये वापर करण्यासाठी प्रायोगिक तत्वावर जेटकुल जेल अग्निशमन यंत्रे खरेदी करण्यात येणार आहेत.

* अग्निशामक विभागाच्या शिफारशीनंतरच ही यंत्रे खरेदी करण्यात येणार आहेत. त्यासाठी दोन कोटी ६४ लाख रुपयांची तरतूद करण्यात आली आहे. * त्याचबरोबर शाळांमध्ये बोलक्या संरक्षक भिंतींची निर्मिती, वन्यजीव आणि जैवविविधतेच्या माहितीसाठी उपक्रम, शिक्षण विभागाच्या उपक्रमांची चित्रफितीद्वारे प्रसिद्धी आदींसाठी निधीची तरतूद करण्यात आली आहे.