सेनेला आस, भाजपला विश्वास

विधानसभेतील स्पष्ट बहुमतासाठी काही आमदार कमी असलेल्या देवेंद्र फडणवीस यांच्या नेतृत्वाखालील भाजप सरकारला बुधवारी विश्वासदर्शक ठरावाला सामोरे जावे लागणार आहे. सत्तेत सहभागी होण्याची शिवसेनेची आस अजूनही कायम असून बुधवारी सकाळपर्यंत भाजपच्या प्रस्तावाची वाट पाहण्याचे सेनेने ठरवले आहे. मात्र, शिवसेनेने विरोधी पक्षांत बसण्याचा निर्णय घेतला तरी, अपक्ष आणि मित्रपक्षांचे बळ आणि राष्ट्रवादी काँग्रेसचे पाठिंब्याचे आश्वासन यांच्या जोरावर बहुमत सिद्ध करण्याचा भाजपला विश्वास आहे.
मंत्रिपदे आणि खात्यांबाबत भाजपकडून अपेक्षित प्रतिसाद मिळत नसल्याने शिवसेनेने विरोधी पक्षनेतेपदासाठी अर्ज दाखल केला आहे. विधानसभेच्या विशेष अधिवेशनाच्या दुसऱ्या दिवशी, मंगळवारीही शिवसेना विरोधी पक्षाच्या आवेशात सरकारविरोधात आक्रमक राहिली. मात्र, मंगळवारी सायंकाळी शिवसेना पक्षप्रमुख उद्धव ठाकरे यांच्या उपस्थितीत झालेल्या बैठकीनंतर, बुधवारी सकाळपर्यंत भाजपच्या प्रस्तावाची वाट पाहण्याचे शिवसेनेने जाहीर केले. विधानसभा अध्यक्ष निवडणुकीच्या क्षणापर्यंत शिवसेनेकडून याबाबत अंतिम निर्णय जाहीर होण्याची शक्यता आहे.
शिवसेनेने विरोधी बाकांवर बसण्याचा निर्णय घेतला तरी, भाजपला विश्वासदर्शक ठराव जिंकणे फारसे कठीण नाही. भाजपकडे १२२ सदस्य असून हितेंद्र ठाकूर यांच्या बहुजन विकास आघाडीचे तीन, सात अपक्ष आणि शेकापसह काही सदस्यांचा पाठिंबा गृहीत धरता सरकारला किमान १४० सदस्यांचा पाठिंबा मिळेल, असे मुख्यमंत्री फडणवीस यांनी सांगितले. त्याशिवाय राष्ट्रवादीनेही सरकार ‘पडू न देण्याचे’ आश्वासन दिले आहे.