मुंबई : मुस्लीम समाजासाठी पवित्र असलेला ‘मोहम्मद पैगंबर’ साहेबांचा जन्मदिवस शुक्रवारी ५ सप्टेंबर २०२५ रोजी असून शनिवारी ६ सप्टेंबर रोजी अनंत चतुदर्शीनिमित्त राज्यभर श्रीगणेश विसर्जन आहे. त्यामुळे ‘ईद -ए-मिलादुन नबी’चे जुलूस ८ सप्टेंबर रोजी काढण्यात येणार असल्याने या दिवशी राज्य शासनाने शासकीय सुट्टी जाहीर करावी, अशी मागणी समाजवादी पक्षाचे ‘भिवंडी पूर्व’चे आमदार रईस शेख यांनी मुख्यमंत्री देवेंद्र फडणवीस यांच्याकडे केली आहे.
हिंदु -मुस्लीम एकोपा अबाधित राहावा या उद्देशाने विविध मुस्लीम संघटनांची ऑल इंडिया खिलाफत कमिटीची मुंबईत बैठक पार पडली. या बैठकीत मोहम्मद पैगंबर साहेब यांच्या जन्मदिनी काढण्यात येणारा जुलूस सोमवार दि. ८ सप्टेंबर रोजी आयोजित करण्याचा सर्वानुमते निर्णय झाला. या निर्णयाची राज्यभर अंमलबजावणी होणार आहे, असे आमदार शेख म्हणाले.
