रुळावर जखमी अवस्थेत पडलेल्या २९ वर्षीय विनायक परब या तरुणाला सीएसएमटी-पनवेल लोकलवरील मोटरमन व गार्डने मदतीचा हात दिला. जखमी तरुणाला लोकलमधून प्रवाशांच्या मदतीने कुर्ला स्थानकापर्यंत नेले. त्यामुळे सायन रुग्णालयात तरुणावर त्वरित उपचार सुरू करण्यात आल्याने त्याचे प्राण वाचले. ही घटना शनिवारी मध्यरात्री एकच्या सुमारास घडली. सीएसएमटीहून पनवेल लोकलवर मोटरमन सूर्यकांत पाटील आणि गार्ड बबलू कुमार कार्यरत होते. शनिवारी मध्यरात्री एक वाजता या लोकलने चुनाभट्टी स्थानक सोडताच बाजूच्या रुळांवर विनायक परब जखमी अवस्थेत दिसला. त्यानंतर त्यांनी लोकल थांबवत तात्काळ मदतकार्य राबविले.
