नालासोपारा : शॉर्ट सर्किटने टीव्हीचा स्फोट; घरात अडकलेल्या आठ वर्षाच्या मुलाला शेजाऱ्याने वाचवले

नालासोपारा विजय नगर परिसरातील साईधाम इमारतीत पहिल्या मजल्यावर राहणाऱ्या गोविंद विश्वकर्मा यांच्या घरात ही घटना रविवारी दुपारी १२ वाजेच्या सुमारास घडली. गोविंद यांची पत्नी भाजीपाला आणण्यासाठी खाली गेली असता, त्यांनी घराला बाहेरून कुलूप लावले होते. यावेळी त्यांचा आठ वर्षाचा मुलगा घरात मोबाईलवर खेळत होता. दरम्यान, अचानक बंद टीव्हीतून धूर निघून आगीचा भडका उडाला. यावेळी या मुलाने बाल्कनीत जाऊन आराडा ओरडा करत शेजाऱ्यांना बोलावले. शेजाऱ्यांनी घराचे कुलूप तोडून मुलाला सुखरूप बाहेर काढत आग विझवली.

शेजाऱ्यांनी माहिती दिली की, वसई-विरार महानगरपालिका अग्निशमन दलाला फोन केला असता तब्बल एक तासाने त्यांची गाडी आली तोवर स्थानिकांनी आग विझवली होती. यात कोणतीही जीवितहानी झाली नसून घराचा टीव्ही जळून खाक झाला.