राज्यभर आंदोलन करण्याचा इशारा मुंबई : नगर जिल्हा रुग्णालय आगप्रकरणी डॉक्टर आणि परिचारिकांवर केलेली कारवाई चुकीची असल्याचा आरोप करत याविरोधात राज्य परिचारिका आणि आरोग्य कर्मचारी संघटनेने आजपासून कामबंद आंदोलन पुकारले आहे. नगर जिल्हा रुग्णालयातील अत्यावश्यक सेवा वगळता सर्व सेवा बंद असणार आहेत. याची वेळेत दखल न घेतल्यास राज्यभरातील आरोग्य सेवा बंद करण्याचा इशारा संघटनेने दिला आहे. या दुर्घटनेमध्ये परिचारिका आणि डॉक्टरांना दोषी ठरवून निलंबित आणि सेवा समाप्त केल्या गेल्या. पोलिसांनी दबावाखाली घाईने कारवाई केल्याचे मत संघटनेने व्यक्त केले आहे. कोणताही चौकशी अहवालात सादर न होता परिचारिका आणि डॉक्टरांवर केलेली कारवाई मागे घेण्याची मागणी करत संघटनेने गुरुवारपासून नगर जिल्हा रुग्णालयात कामबंद आंदोलन सुरू केले आहे. याबाबत त्वरित निर्णय न झाल्यास उपजिल्हा रुग्णालय, प्राथमिक आरोग्य केंद्र, उपकेंद्रातील परिचारिका आणि डॉक्टर यात सहभागी होतील. याचा पुढचा टप्पा म्हणून राज्यभरातील आरोग्य कर्मचारी कामबंद करून आंदोलन तीव्र केले जाईल. - अजय क्षीरसागर, संघटक, राज्य परिचारिका आणि आरोग्य कर्मचारी संघटना
