ओशिवरा स्थानकाचे काम ऑगस्टअखेर सुरू होणार

पश्चिम रेल्वेवरील जोगेश्वरी आणि गोरेगाव रेल्वे स्थानकादरम्यान उभे राहत असलेले ओशिवरा स्थानक ऑगस्टअखेर सुरू होण्याची शक्यता आहे. या स्थानकाला जोडण्यात येणाऱ्या पादचारी पुलाला पालिकेकडून परवानगी मिळाली असून स्थानकातील अन्य कामाला गती आली आहे.
मुंबई रेल्वे विकास महामंडळाच्या मुंबई नागरी विकास प्रकल्पाच्या दुसऱ्या टप्प्यामध्ये हार्बर मार्गाचा विस्तार अंधेरी ते गोरेगाव करण्याचे जाहीर झाले होते. मात्र ओशिवरा येथील स्थानकाच्या उभारणीचे काम रेंगाळल्यामुळे ऑगस्ट २०१३ मध्ये पूर्ण होणारा हा प्रकल्प आता मार्च २०१४ मध्ये पूर्ण होणार आहे. या स्थानकाला दोन्ही बाजूने जोडणारा पादचारी पूल पालिकेच्या परवानगीमुळे रखडला होता. त्याचप्रमाणे या स्थानकामुळे तेथे असलेल्या उड्डाण पुलालाही अडथळा निर्माण होत होता. हे दोन्ही अडथळे आता दूर झाले असून स्थानकाच्या कामास गती आली आहे. याच मार्गाचा पुढील विस्तार बोरिवलीपर्यंत करण्याची घोषणा महामंडळाच्या तिसऱ्या टप्प्यात करण्यात आली आहे. मात्र निधीअभावी हा प्रकल्प पूर्ण होण्याचा कालावधी किमान तीन वर्षे पुढे जाण्याची शक्यता आहे.
मुंबई रेल्वे विकास महामंडळाने तीन टप्प्यांमध्ये मुंबईच्या रेल्वे वाहतुकीचा विस्तार करण्याचे जाहीर केले. त्यातील पहिल्या टप्प्यातील अनेक प्रकल्प २०१२ मध्ये पूर्ण झाले असून दुसऱ्या टप्प्यातील प्रकल्पांचे काम अत्यंत धीम्या गतीने सुरू
आहे.
राज्य सरकारकडून पुरेशा प्रमाणात निधी उपलब्ध होत नसल्यामुळे अनेक प्रकल्प कागदावरच राहण्याची भीती निर्माण झाली आहे. रेल्वेमंत्री पवनकुमार बन्सल यांनी मुंबई दौऱ्यात प्रकल्प वेळेत पूर्ण होण्यासाठी निधी उपलब्ध करून देण्याबाबत मुख्यमंत्र्यांशी चर्चा झाल्याचे सांगितले होते. मात्र राज्य शासनाच्या असहकारामुळे तिसऱ्या टप्प्यातील सर्व प्रकल्प पूर्ण होण्यासाठी आणखी किमान पाच वर्षे लागतील असे रेल्वे अधिकाऱ्यांचे म्हणणे आहे.
एमयुटीपीच्या दुसऱ्या टप्प्यात जाहीर करण्यात आलेले प्रकल्प आणि त्यांची सद्य:स्थिती
मुंबई सेंट्रल आणि बोरिवली दरम्यान सहावा मार्ग : वांद्रे ते दादर दरम्यान काम सुरू (डिसेंबपर्यंत पूर्ण होणार)
सीएसटी-कुर्ला पाचवा-सहावा मार्ग : परळ-कुर्ला दरम्यान सर्वेक्षण पूर्ण; सीएसटी-परळ मार्गात अडथळा
ठाणे-दिवा दरम्यान पाचवा-सहावा मार्ग: पारसिक बोगद्याजवळ काम सुरू (तीन महिन्यात पूर्ण होणार)
तिसऱ्या टप्प्यात जाहीर झालेले प्रकल्प
हार्बर मार्गावर फास्ट कॉरीडॉर (प्रकल्पासाठी निधी मंजूर)
विरार-वसई-दिवा-पनवेल स्वतंत्र उपनगरी रेल्वे मार्ग (अद्याप सर्वेक्षण नाही)
हार्बर मार्गाचा गोरेगाव ते बोरिवली विस्तार (अंधेरी-गोरेगाव मार्ग पूर्ण झाल्यावर कामाला सुरुवात)
विरार-डहाणू दरम्यान तिसरा-चौथा मार्ग (निधी नाही)
बोरिवली-विरार दरम्यान पाचवा-सहावा मार्ग (भूसंपादन झाले)
कल्याण-कसारा दरम्यान तिसरा-चौथा मार्ग (निधी नाही)
कल्याण-कर्जत दरम्यान तिसरा-चौथा मार्ग (निधी नाही)