Sharad Pawar Viral Photo : ‘कधी पावसात, तर कधी रांगेत’, शरद पवार यांच्या विमानतळावरील फोटोची जोरदार चर्चा

शरद पवार यांनी कॅन्सरसारख्या आजाराचा सामना केल्यानंतरही आपलं राजकीय कामातील सातत्य जराही कमी केलेलं नाही. अगदी वयाच्या या टप्प्यावरही वादळानंतरचा महाराष्ट्राचा दौरा असो की विरोधकांच्या समोर निवडणुकीच्या मैदानात भर पावसात दंड थोपटणं असो पवार पायाला भिंगरी लावून फिरताना दिसतात. त्यामुळेच त्यांच्यातील हा उत्साह एखाद्या तरुणालाही लाजवेल असा आहे. आता तर विमानतळावर व्हीआयपी दर्जा असतानाही शरद पवार सर्वसामान्यांप्रमाणे प्रवेशाच्या रांगेत उभे दिसल्याने त्यांच्या चाहत्यांनी त्यांच्यावर कौतुकाचा वर्षाव केलाय.

हेही वाचा : शरद पवारांना ‘आगलावे’ म्हणणाऱ्या सदाभाऊ खोत यांना राष्ट्रवादीने दिलं उत्तर; म्हणाले “सूर्यावर थुंकण्याचा…”

शरद पवार यूके ९७० या विमानाने मुंबईहून दिल्लीला जात असतानाचा हा फोटो असल्याचं बोललं जात आहे. मुंबईहून विमानात बसताना शरद पवार यांनी आपल्या व्हीआयपी दर्जाचा उपयोग करून वेगळा प्रवेश न करता सर्वसामान्य प्रवाशांप्रमाणे रांगेत उभं राहून विमानात प्रवेश केला. त्यामुळेच महाविकासआघाडीचे समर्थक शरद पवार यांच्या या कृतीला त्यांचा हिमालयाच्या उंचीएवढा साधेपणा म्हणत आहेत.