खात्यात पैसे असताना उसनवारीची वेळ

पंजाब आणि महाराष्ट्र को-ऑपरेटिव्ह बँकेवर (पीएमसी) रिझव्‍‌र्ह बँकेने घातलेल्या र्निबधांचा फटका सर्वसामान्य खातेदारांना सहन करावा लागत आहे. रिझव्‍‌र्ह बँकेने पुढील सहा महिन्यांमध्ये १० हजारांची रक्कम काढण्याची मुभा देत खातेदारांना काहीसा दिलासा दिला असला तरी तोही जखमेवर तात्पुरती मलमपट्टी असल्याची प्रतिक्रिया सर्वसामान्य खातेदार व्यक्त करत आहेत. र्निबधांमुळे कष्टाचे पैसे गरजेच्या वेळेस काढता येणार नसल्याने ते हवालदिल झाले आहेत. ज्यांचे केवळ पीएमसीमध्येच खाते आहे त्यांना दैनंदिन गरजा भागविण्याकरिता उसनवारी करण्याची वेळ आली आहे.

आयुष्यभर दादर परिसरात घरकाम करून सरूबाई किसन वाघचौरे यांनी १ लाख ५० हजार रुपये पीएमसी बँकेतील बचत खात्यात ठेवले. त्यांचे वय आता ७० वर्षांपेक्षा अधिक आहे. हे पैसे उतारवयात औषधोपचार आणि इतर गरजांकरिता त्यांनी जमवले. त्यांच्या घरी मुलगी आणि त्या अशा दोघीच आहेत. मात्र बँकेतील पैसे काढता येणार नसल्याने भीतीने त्यांच्या काळजाचा ठोका चुकला. उद्या काही अडचण आली आणि पैसे मिळाले नाहीत, तर आम्ही काय करायचे हा प्रश्न त्या अधिकाऱ्यांना विचारत होत्या. त्यांची समजूत काढताना बँक कर्मचाऱ्यांना तारेवरची कसरत करावी लागत होती. शहरातील बहुतांश भागातील नागरिकांची स्थिती सरूबाई यांच्यासारखीच आहे. बँकेच्या व्यवहारांवर र्निबध आले असतानाही नागरिक बँकेत चकरा मारत आहेत. त्यांचे पैसे सुरक्षित असून लवकरच ते त्यांना मिळतील, अशा शब्दांत बँकेचे कर्मचारी त्यांना दिलासा देत होते.

जयेशकुमार करोटीया यांचे पगाराचे खाते पीएमसी बँकेत असून त्यामध्ये १ लाख २२ हजार रुपये शिल्लक आहेत. त्यांची काही दिवसांपूर्वी हर्नियाची शस्त्रक्रिया झाली. त्यासाठी सुमारे ३० हजारांचा खर्च आला. नातेवाईक-मित्रांकडून पैसे घेऊन दवाखान्याचा खर्च त्यांनी भागविला. बँकेतील पैशांतून ते हे कर्ज फेडणार होते. मात्र बँकेचे खातेच गोठवण्यात आल्याने त्यांची अडचण झाली आहे. त्यांचे दुसऱ्या बँकेत खाते नाही. त्यामुळे पैसे असूनही त्यांना पुढील सहा महिने अडचणीत काढावे लागणार आहेत. लोकांचे पैसे कसे द्यायचे आणि कुटुंबाचा खर्च कसा भागवायचा हा प्रश्न त्यांच्यासमोर आ वासून उभा आहे.

आशुतोष सरकार कोलकाताहून मुंबईत पोटापाण्याकरिता आले. त्याचे पगाराचे खाते बँकेत आहे. खाते गोठवल्याने दररोजचा खर्च भागवण्यासाठी घरून पैसे मागवण्याची वेळ आली आहे. त्यांचे सुमारे ३० हजार रुपये अडकले आहेत. तेजिंदरसिंग लांबा यांचेही सुमारे ६ लाख रुपये पीएमसी बँकेच्या खात्यात अडकले आहेत. त्यांचा सायन परिसरात पेट्रोल पंप असून व्यवसायातील गुंतवणुकीसाठी हे पैसे गरजेचे आहेत.

शीव परिसरातील गृहनिर्माण संस्था अडचणीत

शीव परिसरातील शीव-प्रतीक्षानगर को-ऑपरेटिव्ह हाऊसिंग फेडरेशनच्या अंतर्गत ३६ गृहनिर्माण संस्था आहेत. या फेडरेशनच्या पदाधिकाऱ्यांनी दिलेल्या माहितीनुसार त्यापैकी सिंधुदुर्ग, पारिजात अशा १४ गृहनिर्माण संस्थांचे खाते हे पीएमसी बँकेत आहे. ‘या १४ गृहनिर्माण संस्थांपैकी अनेकांचे खाते हे केवळ याच एक बँकेत आहे. या सर्वाचे मिळून सुमारे चार ते पाच कोटी रुपये अडकून पडले असून या सर्वाचीच मोठी गैरसोय झाली आहे. आम्ही रिझव्‍‌र्ह बँक आणि संबंधित अधिकाऱ्यांना निवेदन देऊन यावर तोडगा काढण्याची विनंती करणार आहोत,’ असे फेडरेशनचे अध्यक्ष अंकुश सारंग यांनी सांगितले.