फेसबुकवर विकृत छायाचित्र प्रसिद्ध करून अल्पसंख्याक समाजाच्या भावना दुखविणाऱ्या अज्ञात व्यक्तीविरुद्ध शुक्रवारी गुन्हा दाखल करण्यात आला. समाजात तेढ निर्माण करणे, माहिती व तंत्रज्ञान कायद्यांतर्गत गुन्हे दाखल करण्यात आले आहेत, असे कल्याणमधील बाजारपेठ पोलीस ठाण्याचे वरिष्ठ निरीक्षक आर. आर. पाटील यांनी सांगितले.
या छायाचित्रामुळे अल्पसंख्याक समाजाच्या भावना दुखावल्या गेल्यामुळे भिवंडी परिसरात गुरुवारी तणाव झाला होता. फेसबुकवरील छायाचित्रात एका समाजाच्या प्रार्थनास्थळाची विटंबना करण्यात आली असल्याची माहिती काशिद नानजी यांनी माजी उपमहापौर जावेद जवने यांना दिली. नंतर जावेद यांनी बाजारपेठ पोलीस ठाण्यात अज्ञात व्यक्तीविरुद्ध गुन्हा दाखल केला.