‘मुंबई हल्ल्याची पूर्वसूचना दिली होती!’

मुंबईवर २६ नोव्हेंवर २००८ रोजी दहशतवाद्यांनी हल्ला केला. परंतु अशा प्रकारचा हल्ला होणार आहे, याची लेखी सूचना दोन महिन्यांपूर्वीच रेल्वेच्या अतिरिक्त पोलीस महानिरीक्षकांना दिली असल्याचा दावा इब्राहीम मुनीर शेख या बडतर्फ तिकीट तपासनीसाने केला आहे. २० सप्टेंबर २००८ रोजी असे पत्र सादर केल्याचे त्यांनी सांगितले.
शेख हे पश्चिम रेल्वेत वरिष्ठ तिकिट तपासनीस होते. २००६ या काळात नकली तिकिट मशीन प्रकरणाचा गौप्यस्फोट आपण केला होता. परंतु या प्रकरणात आपल्याला आरोपी करून नंतर तुरुंगात टाकण्यात आल्याचा दावा त्यांनी केला. शेख २००८ साली भायखळा तुरूंगात होते. तुरूंगात असताना त्यांनी २० सप्टेंबर २००८ रोजी रेल्वेचे तत्कालिन अतिरिक्त पोलीस महानिरीक्षक के. पी. रघुवंशी यांना मराठीतून एक पत्र पाठवले होते. या पत्राची प्रत ‘लोकसत्ता’कडे आहे. मुंबईच्या छत्रपती शिवाजी टर्मिनसवर रात्री दहा वाजल्यापासून दहशतवादी मृत्यूचे तांडव घडविणार आहेत, असे या पत्रात नमूद केले होते. तुरूंगातून ही माहिती मिळाल्याचे त्यांनी या पत्रात म्हटले होते. आपल्या या पत्राची तेव्हा कुणी दखल घेतली नाही, अशी खंत शेख यांनी व्यक्त केली.
आता हा हल्ला घडून चार वर्षे झाली तरी अद्यापही कुणी आपली चौकशीही केली नसल्याचे त्यांनी सांगितले. तुरूंगात असताना अनेक गुन्हेगार आणि खबरी संपर्कात आले. त्यांच्या चर्चेतून ही माहिती मिळाली होती. त्यामुळे मी सावध करण्याचा प्रयत्न केला. मी आरोपी म्हणून तुरूंगात होतो. त्यामुळे कदाचित माझ्या पत्राकडे दुर्लक्ष केले गेले असेल. पण माझ्या माहितीची शहानिशा करायला हवी होती, असेही त्यांनी सांगितले.