पुण्यात १२ हजार चौरस फूट जागेवर उभारला ‘घबाडकुंड’चा रहस्यमयी सेट, पहा थरारक दृष्ये

‘प्रेक्षकांना वेगळे काही तरी पाहण्याची इच्छा असते. ‘अल्याड पल्याड’ चित्रपटाच्या यशानंतर काही तरी वेगळे करण्याचे ठरवले. कथेपेक्षा एक वेगळा अनुभव द्यायचा आहे. विनोद, भय, थरार, रहस्य आणि ॲक्शनने भरलेली परिपूर्ण कलाकृती ‘घबाडकुंड’ हा चित्रपट असणार आहे. त्यासाठी भव्य सेट उभारण्यात आला असून लक्षवेधी दृश्ये येथे चित्रित करण्यात येणार आहेत. इतर भाषांप्रमाणे मराठीतही चौकटीच्या पलीकडे जाऊन चित्रपटांची निर्मिती झाली पाहिजे, हा वेगळा अनुभव ‘घबाडकुंड’ चित्रपटातून प्रेक्षकांना देण्याचा प्रयत्न आहे. कोणीच कधीही न पाहिलेले ‘घबाडकुंड’ हे एक वेगळे जग आहे. जमिनीच्या खाली एक गाव, गाभा आणि कुंड असेल याची कोणीही कल्पना केली नसेल, या मायावी जगात नेमके काय घडते, हे रहस्यमय पद्धतीने ‘घबाडकुंड’ चित्रपटात मांडण्यात आले आहे’, असे दिग्दर्शक प्रीतम एस. के. पाटील यांनी ‘लोकसत्ता’शी बोलताना सांगितले.

‘अल्याड पल्याड’ चित्रपटाच्या घवघवीत यशानंतर दिग्दर्शक प्रीतम एस. के. पाटील हे निर्माते रसिक कदम आणि सह निर्मात्या स्मिता पायगुडे -अंजुटे यांच्या साथीने ‘घबाडकुंड’ हा रहस्यमयी भयपट घेऊन येत आहेत. या चित्रपटात अभिनेता देवदत्त नागे, कुशल बद्रिके, संदीप पाठक, शशांक शेंडे, अभिनेत्री प्राजक्ता हनमघर, स्मिता पायगुडे-अंजुटे, वैष्णवी कल्याणकर, रॉकी देशमुख, आरोही भोईर, साहिल अनलदेवर आदी कलाकारांची फौज झळकणार आहे. तर व्हेलेंटिना इंडस्ट्रीजचे विशेष सहकार्य लाभलेला ‘घबाडकुंड’ चित्रपट मराठी, हिंदी आणि तेलुगू अशा तीन भाषांमध्ये प्रदर्शित होणार आहे.

‘घबाडकुंड’ चित्रपटाची टीम

या चित्रपटाचे लेखन संजय नवगिरे, अक्षय धरमपाल यांचे आहे. तर कलादिग्दर्शन योगेश इंगळे, रंगभूषा अभिषेक, छायांकन योगेश कोळी आणि संकलन सौमित्र धाराशिवकर यांचे आहे. कार्यकारी निर्माता आकाश जाधव व प्रोडक्शन मॅनेजर सिद्धार्थ आहेत. दाक्षिणात्य चित्रपटसृष्टीतील प्रसिद्ध फाईट मास्टर व ‘पुष्पा २’ चित्रपटासाठी काम केलेल्या कार्तिक डंगरी यांनी साहसदृश्यांची जबाबदारी सांभाळली आहे.