सिंधुरक्षकांचा शोध सुरूच

नौदलाच्या ‘सिंधुरक्षक’ या पाणबुडीला जलसमाधी मिळून एक दिवस उलटून गेला तरीही या पाणबुडीतील नौदलाच्या १८ जवानांचा अद्यापही शोध लागलेला नाही. त्यामुळे त्यांच्या सुरक्षेविषयी नौदल आणि या जवानांच्या नातेवाईकांमध्ये चिंतेचे वातावरण आहे. मात्र या पाणबुडीतील जवानांना वाचवण्यासाठी शर्थीचे प्रयत्न अद्यापही सुरूच आहेत, असे नौदलाच्या सूत्रांनी सांगितले. पाणबुडीवर झालेल्या स्फोटांची आणि त्यानंतर भडकलेल्या आगीची तीव्रता प्रचंड असल्याने पाणबुडीतील अनेक भाग वितळले आहेत. यामुळे मदतकार्यात अडथळा येत आहे.
पाणबुडीत अडकलेल्या १८ जवानांचा शोध घेण्यात प्रचंड अडथळे आहेत. आगीमुळे आणि स्फोटांमुळे पाणबुडीच्या अंतर्गत भागातील अनेक भाग इतस्तत: पसरले आहेत. यापैकी काही भाग वितळले असल्याने पाणबुडीत शिरणेही अडचणीचे झाले आहे. पाणबुडीत अजूनही प्रचंड पाणी भरलेले आहे. हे पाणी बाहेर काढण्यासाठी प्रचंड शक्तीचे पंप लावले आहेत. मात्र अजूनही पाणी फारसे बाहेर आलेले नाही, असे सूत्रांनी सांगितले.
संरक्षणमंत्री ए. के. अ‍ॅण्टनी आणि नौदलप्रमुख डी. के. जोशी यांनी बुधवारी घेतलेल्या पत्रकार परिषदेत ‘चांगले घडेल अशी आशा आणि वाईट बातमीची तयारी’ बाळगत असल्याचे सांगितले होते. नौदलाच्या जवानांचा पत्ता लागला नसला, तरीही चमत्कार घडतात, असेही यावेळी नौदलप्रमुख म्हणाले. मात्र आता पाणबुडी बुडून एका दिवसापेक्षा जास्त काळ उलटून गेल्याने नौदल आणि जवानांचे कुटुंबीय यांच्यात चिंतेचे वातावरण आहे.