शिवसेनेत येणाऱ्या काँग्रेस आमदारासाठी खास विमान

श्रीरामपूरचे आमदार भाऊसाहेब कांबळे हे काँग्रेसला सोडचिठ्ठी देऊन शिवसेनेच्या वाटेवर आहेत. गेले काही दिवस त्यांची याबाबत शिवसेना नेत्यांशी चर्चा सुरू होती. सप्टेंबरच्या पहिल्या आठवडय़ात शिवसेनेत प्रवेश करण्याचा भाऊसाहेब कांबळे यांचा निर्णय झाला. एक सप्टेंबरला रविवार व नंतर गणेश चतुर्थीची सुटी असल्याने विधानसभाध्यक्ष हरिभाऊ बागडे हे तीन-चार दिवस उपलब्ध नसतील असे लक्षात आल्यावर भाऊसाहेब कांबळे यांच्यासाठी खास विमानाची सोय करण्यात आली. नंतर मुंबईतून शिवसेनेचे सचिव मिलिंद नार्वेकर हे भाऊसाहेब कांबळे यांना आणि अहमदनगरमधील स्थानिक शिवसेना नेत्यांना घेऊन रात्री विमानाने पुण्याला गेले. तेथे बागडे यांची भेट घेऊन कांबळे यांनी राजीनामा सोपवला. उद्योगमंत्री सुभाष देसाईही यावेळी उपस्थित होते.

याबाबत भाऊसाहेब कांबळे यांच्याशी संपर्क साधला असता, रविवारी व त्यानंतर दोन-तीन दिवस विधानसभाध्यक्ष हरिभाऊ बागडे हे मुंबईबाहेर असल्याने शनिवारीच राजीनामा देणे गरजेचे ठरले होते. बागडे पुण्यात असल्याने त्यांना गाठण्यासाठी विमानाने गेलो, असे कांबळे यांनी स्पष्ट केले.