मुख्यमंत्री एकनाथ शिंदे यांनी आज दैनिक लोकसत्ताच्या ७६ व्या वर्धापन दिनानिमित्त संवाद साधला. यावेळी त्यांनी महाविकास आघाडी सरकार, माजी मुख्यमंत्री उद्धव ठाकरे यांच्यावर टीकास्र सोडलं. तसंच, सरकारच्या आगामी प्रकल्पांविषयीही थोडक्यात माहिती दिली.
“सरकार आज पडणार, उद्या पडणार असे मुहुर्त दिले गेले. पण सरकार अतिशय मजबुतीनं काम करतंय. २० महिने सातत्याने न थकता सर्व प्रसंगांना सामोरे जाऊन मी व माझे सहकारी काम करण्याचा प्रयत्न करत आहोत. हे केलंच पाहिजे. मी उपकारांची जाणीव करून देत नाही. राज्याच्या जनतेला या सत्तेचा फायदा झाला पाहिजे ही भूमिका मनात ठेवून आम्ही काम करतो. मला काय मिळालं यापेक्षा मी या राज्याला, देशाला काय दिलं ही भावना महत्त्वाची आहे”, असं एकनाथ शिंदे म्हणाले.
ते पुढे म्हणाले, “कधीही बाहेर न पडणाऱ्यांना आम्ही बाहेर पडायला लावलं. चार-दोन सभांमधून अर्थहीन आरोप करण्याला काही अर्थ नसतो. अशा लोकांचा अनुभव आपण घेतला आहे. मी फार राजकीय बोलणार नाही. पण बाळासाहेबांची भूमिका व सर्वसामान्य माणसाची भूमिका डोळ्यांसमोर ठेवून आम्ही सरकार स्थापन केलं आहे. माझं कुटुंब, माझी जबाबदारी एवढंच ध्येय समोर न ठेवता अवघा महाराष्ट्र आपलं कुटुंब आहे, ही भावना आम्ही मनात ठेवली. एवढंच सांगतो की काम करणारे कार्यकर्ते, सत्ताधाऱ्यांच्या मागे लोक असतात. राम मंदिराचं उद्घाटन झालं आहे. त्यामुळे सगळ्यांना रामाने सदबुद्धी द्यावी. सगळ्यांना चांगले विचार द्यावेत.”
“आज भारताची अर्थव्यवस्था जगभरात अभिमान वाटावी अशी पुढे आली आहे. सन्मान वाटावा असं आपल्या देशाचं नाव झालं आहे. अर्थव्यवस्था तिसऱ्या क्रमांकावर आणण्याचा उद्देश डोळ्यांसमोर ठेवणं ही मोठी बाब आहे. देशाच्या प्रगतीबद्दल सगळ्यांना अभिमान वाटला पाहिजे. आपल्या प्रत्येकामध्ये राष्ट्रभक्ती असते. मी दावोसला गेलो तेव्हा अनेक देशांचे प्रमुख मला भेटले. पण आपल्या देशाबद्दल, आपल्या पंतप्रधानांबद्दल सन्मानाने ते बोलत होते. हे पाहून मला अभिमान वाटला. आपले मराठी बांधवही मला भेटले. याचं फार समाधान असतं. जो काम करेल त्याची लोकप्रियता वाढेलच. मग इतर लोकांची तगमग वाढते. कुणाचा रक्तदाब वाढतो. पण आपल्या देशाचं नाव वाढताना प्रत्येक देशवासीयाला अभिमान वाटला पाहिजे अशी भावना आम्ही मनात ठेवली आहे”, असंही एकनाथ शिंदे म्हणाले.
