अंधेरीतील प्रवासी संख्या दोन वर्षांत दुप्पट

खासगी व सरकारी कार्यालयांची वाढती संख्या, मोठय़ा प्रमाणात उभ्या राहिलेल्या रहिवासी इमारती, मेट्रो आदी कारणांमुळे गेल्या दोन वर्षांत पश्चिम रेल्वेच्या अंधेरी स्थानकातील प्रवासी भार दुपटीने वाढला आहे. अंधेरी स्थानकातील सोयीसुविधांच्या विस्तारासाठी पश्चिम रेल्वेने सोमवारपासून तीन दिवस केलेल्या सर्वेक्षणात या स्थानकात दररोज १३ लाख प्रवासी ये-जा करत असल्याचे निदर्शनास आले.

पश्चिम रेल्वेवरील अंधेरी व मध्य रेल्वेवरील घाटकोपर स्थानकाला मेट्रो जोडल्यापासून अंधेरीवरील भार वाढला; परंतु तो इतका वाढला असावा, याचा रेल्वेलाही अंदाज नव्हता. रेल्वेमंत्री पीयूष गोयल एका कार्यक्रमानिमित्त मुंबईत आले असताना त्यांनी अंधेरी व घाटकोपर स्थानकातील वाढलेला प्रवासी भार पाहता या स्थानकाचे सर्वेक्षण करून सोयीसुविधांवर अधिक भर देण्याची सूचना रेल्वे प्रशासनाला केली होती. त्यानंतर पश्चिम रेल्वेने गेल्या सोमवारपासून तीन दिवस अंधेरी स्थानकातील सर्वेक्षण सुरू केले. यात प्रवासी संख्या, स्थानकातील सोयीसुविधांचा आढावा घेण्यात आला. त्यात १३ लाख प्रवासी या स्थानकातून ये-जा करत असल्याचे निदर्शनास आले.

अंधेरी स्थानकातून दररोज तिकीट काढून प्रवास करणाऱ्यांची संख्या ही २ लाख ५४ हजार एवढी आहे. तिकीटधारक व पासधारकांबरोबरच या स्थानकात येणाऱ्या व जाणाऱ्या प्रवाशांचीही भर पडलेली आहे. यासंदर्भात पश्चिम रेल्वेचे मुख्य जनसंपर्क अधिकारी रवींद्र भाकर यांनी सांगितले की, सोयीसुविधांचा अधिक विस्तार करण्यासाठी अंधेरी स्थानकातील सर्वेक्षण हाती घेण्यात आले.

प्रवासी संख्या मोजण्यासाठी स्थानकातील १२ प्रवेशद्वारांवर प्रत्येकी चार कर्मचारी सर्वेक्षणासाठी तैनात केले होते, तर प्रवाशांची मोजदाद करण्यासाठी फेस रीडिंग कॅमेराही बसवले. यातूनही प्रवासी संख्या भरमसाट वाढल्याचे समजले. त्यामुळे स्थानकात किती मोकळी जागा असावी, पादचारी पूल, सरकते जिने इत्यादी सुविधांवर भर देण्यावर प्रयत्न केला जाणार असल्याचे भाकर यांनी सांगितले.

प्रवासी १३ लाखांवर

’ अंधेरी स्थानकातून तिकीट काढून प्रवास करणाऱ्या प्रवाशांची संख्या २०१७-१८ रोजी २ लाख ५१ हजार होती. हीच संख्या २०१८-१९ रोजी २ लाख ५४ हजार झाली.

’ एखादा प्रवासी विरार ते चर्चगेट तिकीट काढल्यानंतर काही कामानिमित्त अंधेरी स्थानकात उतरतो किंवा पुन्हा या स्थानकातून परतीचा प्रवास करतो. त्यामुळे अशा प्रकारचे प्रवासी व तिकीटधारक मिळून ही संख्या १३ लाखांपर्यंत असल्याचे समोर आले आहे.

स्थानकातील प्रवासी संख्या

• स्थानक         प्रवासी संख्या
• अंधेरी           ६ लाख ५० हजार
• दादर             ४ लाख ५० हजार
• वांद्रे              ४ लाख
• बोरिवली        ५ लाख

(दोन वर्षांपूर्वी केलेल्या सर्वेक्षणातील आकडेवारी)

मेट्रोमुळेही भार वाढला घाटकोपर-अंधेरी-वसरेवा मेट्रो आल्यानंतर अंधेरी व घाटकोपर स्थानकांतील प्रवासी संख्याही वाढत गेली. अंधेरी मेट्रोतून शनिवार-रविवार सोडता दररोज एक लाख प्रवासी प्रवास करत आहेत. २०१७-१८ मध्ये ९० हजार प्रवासी संख्या होती. त्यामुळे आपोआप त्याचा भारही पश्चिम रेल्वेवरील अंधेरी स्थानकावरही पडला आहे.