मुंबई : वीरमाता जिजाबाई तंत्रज्ञान संस्थेतून अभियांत्रिकीची पदवी, आयआयएम, बंगळुरू मधून व्यवस्थापन शाखेतील पदव्युत्तर पदवी (एमबीए) अशी खासगी क्षेत्रातील वाटचालीसाठी खणखणीत म्हणावी अशी पात्रता असूनही मुंबईच्या प्रियंवदा म्हाडदळकर हिला प्रशासकीय सेवेने साद घातली आणि प्रियंवदाने केंद्रीय लोकसेवा आयोगाच्या (यूपीएससी) गुणवत्ता यादीत तेराव स्थान मिळवले.
मूळची रत्नागिरी येथील आणि मुंबईत शिक्षण घेतलेल्या प्रियंवदाने मुंबईच्या व्हीजेटीआयमधून अभियांत्रिकीची पदवी घेतली. त्यानंतर व्यवस्थापन अभ्यासक्रमासाठी देशातील अव्वल मानल्या जाणाऱ्या आयआयएमपैकी बंगळुरु आयआयएममधून तिने व्यवस्थापन शाखेतील पदव्युत्तर पदवी (एमबीए) घेतली. दरम्यान विद्यार्थी आदान प्रदान योजनेमधून जर्मनीतील विद्यापीठातही काही महिने शिक्षण घेतले. इन्व्हेस्टमेंट बँकिंगसारखा खासगी क्षेत्रात मागणी असलेला विषय असूनही शासकीय सेवेत येण्याचे तिने ठरवले. शैक्षणिक कर्ज फेडण्यासाठी काही काळ नोकरी केल्यानंतर तिने लोकसेवा परीक्षेची तयारी सुरू केली. त्यासाठी जुलै २०२०मध्ये नोकरी सोडली आणि त्याचवर्षी परीक्षेचा अर्जही भरला. मात्र पुरेशी तयारी झाली नाही, असे वाटल्याने मुख्य परीक्षा दिली नाही. गेल्यावर्षी (२०२१) पुन्हा अर्ज भरला आणि देशातील अव्वल उमेदवारांमध्ये तिने स्थान पटकावले. वडील शासकीय सेवेत असल्याने तिला प्रशासकीय सेवेबाबत उत्सुकता होती. फक्त नोकरीच्या पलीकडे जाऊन शिक्षणाचा , समाजासाठी उपयोग करण्याची इच्छा होती. मात्र अन्य क्षेत्रेही तिला खुणावत होती. एमबीए केल्यावर परीक्षेच्या तयारीसाठी वेळ देऊ शकेन, असा आत्मविश्वास वाटू लागल्यानंतर पूर्णवेळ परीक्षेची तयारी सुरू केली. वैकल्पिक विषयासाठी ऑनलाइन शिकवणीचा आधार घेतला, मात्र बाकी पूर्णपणे स्वयंअध्ययन केले, असे प्रियंवदा म्हाडदळकर हिने सांगितले.
भरपूर सराव आणि अभ्यासात नियमितपणा ठेवला. प्रत्यक्ष मुलाखतीसाठी मुद्देसूद मांडणीचे कौशल्य प्राप्त केले. – प्रियंवदा म्हाडदळकर
