अंधेरीत पोलिसांवर गोळीबार करणारा गँगस्टर संदीप गाडोली चकमकीत ठार झाला आहे. एमआयडीसी भागातील एका हॉटेलमध्ये ही चकमक झाली. संदीप गाडोली हा गुरगाव येथील कुख्यात गँगस्टर होता. त्याच्यावर हत्येच्या आरोपासह अनेक गुन्ह्यांची नोंद होती. तसेच, त्याच्यावर १.२५ लाखांचे इनामही जाहीर झाले होते. संदीप हा मुंबईत लपून बसल्याची माहिती मिळाल्यानंतर हरयाणा पोलिसांच्या गुन्हे शाखाचे एक पथक येथे आले होते. तेव्हा तो एमआयडीसी भागातील एका हॉटेलमध्ये राहत असल्याची खबर पोलिसांनी मिळाली. दरम्यान, पोलीस संदीपच्या रुमवर अटक करण्यासाठी गेले असता त्याने पोलिसांवर गोळीबार केला. त्यावेळी प्रत्यूत्तरादाखल पोलिसांनी केलेल्या गोळीबारात संदीप ठार झाला.