कल्याण येथे लोकलच्या छतावर तरुण होरपळला

कल्याण रेल्वे स्थानकात टिटवाळा लोकलच्या छतावर गुरुवारी संध्याकाळी एका होरपळलेल्या तरुणाचा मृतदेह आढळून आला. उच्च दाबाच्या वीज वाहिनीचा धक्का बसून हा मृत्यू ओढावल्याची शक्यता पोलिसांनी व्यक्त केली आहे. रात्री उशीरापर्यंत मृतदेहाची ओळख पटली नव्हती.
टिटवाळा लोकल गुरुवारी संध्याकाळी कल्याण रेल्वे स्थानकात आल्यानंतर प्रवाशांना छतावर एका तरुणाचा होरपळलेला मृतदेह आढळून आला. तातडीने ही माहिती रेल्वे पोलिसांना देण्यात आली. पोलिसांनी मृतदेह काढून रूग्णालयात नेला. लोकलला गर्दी असल्याने हा तरुण छतावर बसून प्रवास करीत असावा. त्यामुळे उच्च दाब वीज वाहिनीचा झटका बसून त्याचा मृत्यू झाला असावा, असे पोलिसांनी सांगितले.