नागपूर : राज्यात विजेची मागणी वाढल्याने अखंडित वीजपुरवठ्यासाठी महावितरणला महागडी वीज विकत घ्यावी लागत आहे. याचा अतिरिक्त भार आधीच ग्राहकांवर पडत असताना आता नागपूर महापालिकेने ‘सी-२०’ परिषदेच्या निमित्ताने केलेल्या रोषणाईमुळे महिन्याला १.८५ लाख युनिट वीज जळत आहे. ‘सी-२०’ परिषद आटोपून बरेच आठवडे उलटल्यावरही रोषणाई कायमच आहे. सूत्रांच्या माहितीनुसार, पथदिव्यांचा वीज वापर मे-२०२२ मध्ये २० लाख २२ हजार युनिट होता. रोषणाई केल्यानंतर म्हणजे मे २०२३ मध्ये हा वापर २२ लाख ८ हजार युनिट नोंदवला गेला. तो गेल्यावर्षीच्या मे महिन्याच्या तुलनेत १ लाख ८५ हजार युनिटने जास्त आहे. या जास्त वीज वापराला ‘सी-२०’च्या रोषणाईसाठी लावलेल्या पथदिव्यांवरील गोल आकारातील सिंबाॅल, सेल्फी पाॅईंट, सौंदर्यीकरणाशी संबंधित विविध उपक्रम, जनजागृतीपर फलक कारणीभूत असल्याचे समोर आले आहे. त्यामुळे महापालिकेकडून नागरिकांना वीज बचतीसाठी केल्या जाणाऱ्या आवाहनावरच प्रश्न उपस्थित झाला आहे. हेही वाचा - ‘बीआरएस’ महाराष्ट्रात सर्व निवडणुका लढवणार; सत्ता आल्यास तेलंगणातील कृषी प्रारूप- के. चंद्रशेखर राव विशेष म्हणजे, उन्हाळ्यात विजेची वाढती मागणी बघत महावितरणने राज्यभरातील ग्राहकांना अखंडित वीजपुरवठ्यासाठी तब्बल १ हजार ३४० दशलक्ष युनिट महागडी वीज खरेदी केली. या विजेसाठी प्रतियुनिट सुमारे ६.०१ रुपये मोजण्यात आले. सिव्हिल लाईन्स, काँग्रेसनगरमध्य सर्वाधिक वीज वापर सर्वाधिक वीज वापर सिव्हिल लाईन्स आणि काँग्रेसनगर या दोन विभागांत नोंदवला गेला. ‘सी-२०’ उपक्रमासाठी सर्वाधिक रोषणाई या दोनच विभागांत करण्यात आली आहे. सिव्हिल लाईन्स विभागात मे २०२२ मध्ये पथदिव्यांवरील वीज वापर ५.६० लाख युनिट तर मे २०२३ मध्ये हा वापर ६.३० लाख युनिट होता. येथे ७० हजार युनिट वीज वापर वाढला. काँग्रेसनगर विभागात मे २०२२ मध्ये वीज वापर ४.०६ लाख युनिट तर मे २०२३ मध्ये ४.६३ लाख युनिट होता. हा वापर ५७ हजार युनिटने वाढला. हेही वाचा - बुलढाणा: समृद्धी महामार्गावर डिझेल चोरी! गस्त पथकाने… ‘सी २०’ परिषदेत देश- विदेशातील पाहुणे सहभागी झाले. या काळात शहर रोषणाईने सजवण्यात आल्याने विजेचा वापर वाढला. आताही नागपूरकरांसह पर्यटक या सुंदर रोषणाईचा आनंद घेत आहेत. त्यामुळे विजेचा अनावश्यक वापर होतो, असे म्हणणे योग्य नाही. - ए.एस. मानकर, सहाय्यक अभियंता, नागपूर महापालिका.
