‘फादर्स डे’निमित्त वडिलांचे देहदान

वैद्यकीय क्षेत्रातील बरेच दिग्गज भाषणांत देहदान करण्याचे सल्ले इतरांना देत असतात, मात्र स्वत: त्याकडे दुर्लक्ष करतात. परंतु शासकीय वैद्यकीय महाविद्यालय व रुग्णालय (मेडिकल)चे मुख्य प्रशासकीय अधिकारी परशुराम दोरवे यांनी ‘फादर्स डे’च्या दुसऱ्याच दिवशी वडिलांचे निधन झाल्यावर मेडिकलमध्येच देहदान करून समाजाला नवीन आदर्श घालून दिला आहे. त्यातच त्यांच्या नेत्रदानामुळे दोघांना नवीन दृष्टी मिळाली आहे, हे विशेष.

काटोल तालुक्यातील रिधोरा येथील डोमाजी दोरवे यांचे सोमवारी निधन झाले. ते ९५ वर्षांचे होते. त्याच्या पश्चात चार मुली आणि एक मुलगा नाव आहे. ते शेतकरी असून त्यांचा मुलगा परशुराम दोरवे हे मेडिकलमध्ये मुख्य प्रशासकीय अधिकारी पदावर आहे. त्यांच्या चारही मुलींचे लग्न झाले आहे. डोमाजी यांनी शेती करून आपल्या मुलांना मोठे केले. गेल्या पंधरा दिवसांपासून त्यांची प्रकृती थोडी खालावली होती. घरातच त्यांच्यावर उपचार सुरू होते असताना सोमवारी सकाळी १० वाजताच्या सुमारास त्यांचे निधन झाले.

‘फादर्स डे’च्या दुसऱ्याच दिवशी वडिलांचे निधन झाल्यामुळे परशुराम दोरवेसह त्यांच्या इतर मुली व मोठय़ा आप्त परिवार मनातून हादरला. दरम्यान, वडिलांनीही घरात मृत्यूनंतर देहदान करण्याची इच्छा व्यक्त केली होती. परशुराम दोरवे यांनी ही माहिती त्यांच्या इतर बहिणींना दिली. कुटुंब राजी होताच तातडीने प्रथम मेडिकलच्या नेत्ररोग विभागासह शरीररचनाशास्त्र विभागाला सूचना दिल्या गेली.

त्यावरून मेडिकलच्या नेत्ररोग विभागाने एका तासात त्यांचे दोन्ही नेत्र काढून दोघांना नवीन दृष्टी दिली. तर शरीररचनाशास्त्र विभागात दुपारी त्यांचे देहदानाचा संकल्प पूर्ण करण्यात आला. याप्रसंगी मेडिकलमध्ये मोठय़ा संख्येने अधिकाऱ्यांसह कर्मचाऱ्यांनी हजेरी लावली. ‘फादर्स डे’च्या दुसऱ्याच दिवशी एका वैद्यकीय क्षेत्रात मोठय़ा पदावर असलेल्या व्यक्तीने स्वतच्या वडिलांच्या मृत्यूनंतर त्यांचे देहदान केल्यामुळे समाजाला नवीन आदर्श घालून दिल्याचे मत याप्रसंगी अनेकांनी व्यक्त केले.