नागपूर : राज्य शासनाच्या ४३ विभागांतर्गत पावणेतीन लाखांहून अधिक पदे रिक्त आहेत. मुख्यमंत्री एकनाथ शिंदे यांच्या घोषणेनुसार ७५ हजार पदांची भरती केली जाणार आहे. राज्यात सत्ताबदलानंतर शिंदे- फडणवीस सरकारने मेगाभरतीची घोषणा केली होती. कालबद्ध पद्धतीने १५ ऑगस्ट २०२३ पूर्वी भरती पूर्ण करण्याचेही जाहीर केले होते. २० ऑक्टोबर २०२२ रोजीच्या मंत्रिमंडळ बैठकीत लोकसेवा आयोगाच्या कक्षेबाहेरील गट- ब, क आणि गट- ड पदभरतीसाठी टीसीएस, आयबीपीएस या कंपन्यांची नियुक्ती करण्याचा निर्णय झाला. विविध पदांच्या जाहिराती आल्या असून भरतीही पूर्ण झाली आहे. त्यानंतर आता जिल्हा न्यायालयामधील विविध पदांसाठी जाहिरात प्रसिद्ध झाली आहे. हेही वाचा : धक्कादायक! क्षुल्लक कारणावरून दोन विद्यार्थ्यांनी संपविले जीवन महाराष्ट्रातील विविध जिल्ह्यांमधील लघुलेखक, कनिष्ठ लिपिक, शिपाई/हमाल या संवर्गातील ४६२९ पदांसाठी जिल्हा न्यायालय भरती २०२३ जाहीर झाली आहे. सदर भरतीची तपशीलवार अधिसुचना जाहीर करण्यात आली. सदर भरतीसाठी इच्छुक व पात्र उमेदवार ४ डिसेंबर ते १८ डिसेंबरपर्यंत ऑनलाईन पद्धतीने अर्ज करू शकतात. जिल्हा न्यायालय भरती २०३ अंतर्गत महाराष्ट्रातील विविध जिल्ह्यांमधील लघुलेखक, कनिष्ठ लिपिक, शिपाई/हमाल या पदांसाठी भरती करण्यात येणार आहे. या बाबतची तपशीलवार अधिसूचना ४ डिसेंबर रोजी जाहीर झाली आहे. पदांची नावे- लघुलेखक, कनिष्ठ लिपिक, शिपाई/हमाल ही असून अर्ज करण्यास अधिकृत संकेतस्थळ www.bombayhighcourt.nic.in हे असून यावर अर्ज करावे असे आवाहन करण्यात आले आहे.
