नागपूर : सहकारी प्राध्यापकांविरोधात लैंगिक छळाची तक्रार असल्याचे सांगून त्यांची आर्थिक लूट करणारे राष्ट्रसंत तुकडोजी महाराज नागपूर विद्यापीठाचे प्राध्यापक डॉ. धर्मेश धवनकर यांना प्राथमिक चौकशी समितीने दोषी ठरवले आहे. त्यानंतर विभागीय चौकशी करण्यात यावी, अशी शिफारस अहवालात केली असून उच्च न्यायालयाच्या निवृत्त न्यायमूर्तींची समिती गठित करण्यात आली आहे.
समिती सदस्यांनी विद्यापीठाला सहमती पत्र दिले असून लवकरच समितीमधील सदस्यांची नावे जाहीर केली जाणार आहे. धवनकर प्रकरणाच्या प्राथमिक चौकशीसाठी नेमण्यात आलेल्या निवृत्त न्यायाधीश अजय चिंतामण चाफले यांच्या समितीने आपला अहवाल कुलगुरू डॉ. सुभाष चौधरी यांना सोपवला आहे. चाफले यांनी सातही तक्रारकर्त्यांना बोलावून त्यांचा जबाब नोंदवला.
हेही वाचा >>> नागपूर : पोटच्या मुलीवर सतत तीन वर्षे अत्याचार, नराधम पित्याला पंधरा वर्षे कारावास
तक्रारकर्तेही शेवटपर्यंत आपल्या तक्रारीवर ठाम होते. त्यांनी धवनकर यांनी कशी फसवणूक केली याची संपूर्ण माहिती दिली. त्यावर समितीने आपल्या अहवालात धवनकर यांना दोषी ठरवले. तसेच धवनकर यांची विभागीय चौकशी करावी अशी शिफारसही केली आहे. त्यामुळे उच्च न्यायालयाच्या निवृत्त न्यायमूर्तींची समिती तयार करण्यात आली असून ही समिती चौकशी करणार आहे. समितीच्या अध्यक्षांनी चौकशी समितीसाठी होकार दिला आहे. समितीमधील सदस्यांची नावे लवकरच जाहीर केली जाणार आहेत.
