किडनी प्रत्यारोपण विभागाला मुहूर्त

सुपर स्पेशालिटीतील पहिली शस्त्रक्रिया २८ जानेवारीला करण्याची तयारी
‘मेडिकल’च्या आखत्यारीतील सुपर स्पेशालिटी रुग्णालयातील किडनी प्रत्यारोपण युनिटला महाराष्ट्र प्रदूषण महामंडळासह आरोग्य विभागाकडून हिरवा कंदिल मिळताच प्रशासन पहिल्या किडनी प्रत्यारोपणाच्या शस्त्रक्रियेसाठी कामाले लागले आहे. त्याकरिता रुग्णासह किडनीचा देणगीदारही उपलब्ध झाल्याची माहिती सूत्रांनी दिली आहे. २८ जानेवारीला पहिली शस्त्रक्रिया करण्याचा मुहूर्त जवळपास निश्चित झाला असून, शस्त्रक्रिया यशस्वी झाल्यास ‘सुपर’ ही किडनी प्रत्यारोपण करणारी मध्य भारतातील पहिली शासकीय संस्था ठरेल.
‘सुपर’ला निश्चित केलेली शस्त्रक्रिया सीव्हीटीएसच्या शस्त्रक्रिया गृहात होईल. नागपूरसह संपूर्ण देशात किडनीच्या आजाराचे रुग्ण मोठय़ा प्रमाणात वाढत आहे. किडनीचा विकार जडल्याने मध्य भारतातील हजारो रुग्ण डायलिसीसवर आपले आयुष्य जगत आहेत. शेकडो रुग्णांना किडनी प्रत्यारोपणाची गरज असतानाही किडनी उपलब्ध होत नसल्याने अनेकांचा मृत्यूही होतो. या रुग्णांना दिलासा देण्यासाठी नागपूरच्या सुपर स्पेशालिटी रुग्णालयात मध्य भारतातील पहिल्या किडनी प्रत्यारोपण युनिटची घोषणा महाराष्ट्र शासनाकडून अनेक वर्षांपूर्वी विधानसभेत करण्यात आली होती. परंतु शासनाकडून आवश्यक निधीसह या विभागाकरिता तज्ज्ञ डॉक्टरांसह आवश्यक कर्मचारी, तंत्रज्ञ उपलब्ध करून देण्यात न आल्याने हा प्रकल्प रखडला होता.सुपर स्पेशालिटी रुग्णालयात काही महिन्यांपूर्वी विशेष कार्यकारी अधिकारी डॉ. मनीष श्रीगिरीवार यांची नियुक्ती झाली. त्यांनी अधिष्ठाता डॉ. अभिमन्यू निसवाडे यांच्या मदतीने या प्रकल्पाकरिता शासनाकडे पाठपुरावा केला. दरम्यान, या प्रकल्पासाठी महाराष्ट्र प्रदूषण महामंडळासह सार्वजनिक आरोग्य विभागाची परवानगी मिळत नसल्याने हा प्रकल्प रखडण्याची शक्यता निर्माण झाली होती. परंतु केंद्रीय भूपृष्ठ वाहतूक मंत्री नितीन गडकरी यांनी अभ्यागत मंडळाच्या बैठकीत तातडीने परवानगी देण्याच्या सूचना संबंधित विभागाला केल्या. त्यानंतर ‘सुपर’च्या किडनी प्रत्यारोपण युनिटसाठी सगळ्या परवानग्या मिळाल्या आहे. प्रशासनाकडून रुग्णासह एक किडनीचा देणगीदारही उपलब्ध झाला आहे. या रुग्णावर शस्त्रक्रिया करण्याकरिता सुपरला आधीच आवश्यक तज्ज्ञ डॉक्टरांनी नियुक्ती केली गेली आहे. तेव्हा या डॉक्टरांच्या मदतीकरिता निवासी डॉक्टरांची गरज भासणार असून, ते मेडिकलच्या वतीने उपलब्ध करून दिले जाणार असल्याचे अधिष्ठाता डॉ. अभिमन्यू निसवाडे यांनी संबंधित विभागाला सांगितले आहे. पहिल्या टप्यात २८ जानेवारीला , रुग्णासह देणगीदाराची प्रकृती चांगली राहली तर त्याच दिवशी शस्त्रक्रिया होईल.
डायलिसीस उपकरणे वाढणार
किडनीच्या रुग्णांना डायलिसीस करण्याची गरज असते. हे डायलिसीस केव्हा किती दिवसांत करावे हे रुग्णाच्या किडनीच्या कार्यक्षमतेवर डॉक्टर निश्चित करतात. खासगी रुग्णालयांमध्ये डायलिसीस करण्याकरिता जास्त खर्च येत असल्याने मध्यमवर्गीयांनाही हा खर्च झेपणे कठीण होते. तेव्हा त्यांना सुपर स्पेशालीटी या संस्थेचाच आधार असतो. परंतु सुपरमध्ये डायलिसीससाठी लागणारी उपकरणे कमी असल्याने येथे मोठय़ा प्रमाणावर रुग्ण प्रतीक्षेत असतात. लवकरच सुपरला दोन डायलिसीस उपकरणे वाढवून मिळणार असल्याने त्याचा मोठय़ा संख्येने रुग्णांना लाभ होईल.