अमरावती : बडनेरा हद्दीतील भानखेडा रोडजवळ जंगलात आढळलेल्या अज्ञात व्यक्तीच्या हत्येचे गूढ अवघ्या आठ तासांत उलगडण्यात अमरावती शहर गुन्हे शाखेला यश आले आहे. अनैतिक संबंधांच्या आड येणाऱ्या पतीची, पत्नीनेच प्रियकराच्या मदतीने कट रचून निर्घृण हत्या केल्याचे तपासात उघड झाले आहे.
प्रमोद बकाराम भलावी (४२, रा. कारला, हल्ली रा. अंजनगावबारी) असे मृत व्यक्तीचे नाव आहे. याप्रकरणी पोलिसांनी मृत प्रमोदची पत्नी छाया आणि तिचा प्रियकर विश्वांबर दिगांबर मांजरे (३९, रा. विश्वी, जि. बुलडाणा) या दोघांना अटक केली आहे.
काय आहे घटना?
पोलिसांनी दिलेल्या माहितीनुसार, बुधवारी (दि. १२) सायंकाळी आठ वाजण्याच्या सुमारास हनुमान गढी ते भानखेडा रोडवरील जंगलात एका युवकाचा मृतदेह आढळला होता. डोक्यात दगड टाकून चेहरा विद्रूप केल्यामुळे त्याची ओळख पटवणे कठीण होते. घटनास्थळी पोलिसांना एक मोटारसायकल आढळली. हाच धागा पकडून पोलिसांनी तपास सुरू केला. ही मोटारसायकल टवलार (ता. अचलपूर) येथील एका व्यक्तीच्या नावे असली तरी, ती काही दिवसांपूर्वीच प्रमोद भलावी याला विकल्याची माहिती मिळाली. तो सध्या दिवाळीपासून अंजनगावबारी येथे पत्नी छायासोबत राहत असल्याचे समजले.
पत्नीच्या उडवाउडवीच्या उत्तरांमुळे संशय
पथकाने पत्नी छायाकडे चौकशी केली असता, तिने उडवाउडवीची उत्तरे देण्यास सुरुवात केली. यामुळे पोलिसांचा संशय बळावला. तपासात छायाचे विश्वांबर मांजरे नावाच्या व्यक्तीसोबत अनैतिक प्रेमसंबंध असल्याची माहिती मिळाली. गुन्हे शाखेचे पथक तातडीने बुलडाणा जिल्ह्यातील विश्वी गावी रवाना झाले व गुरुवारी आरोपी विश्वांबरला ताब्यात घेतले. विश्वांबर हा मिस्त्रीचे काम करतो. डिसेंबर २०२४ मध्ये छायाच्या घराचे काम करत असताना त्यांची ओळख झाली होती. दिवाळीत पती प्रमोद याला या संबंधाची कुणकुण लागल्याने दोघांनी मिळून त्याचा काटा काढण्याचा कट रचला.
हत्येची दिली कबुली
पोलिसांनी विश्वांबरची चौकशी केली असता, त्याने गुन्ह्याची कबुली दिली. सोमवारी (दि. १०) रात्रीच दोघांनी प्रमोदला घटनास्थळी नेले. तेथे लघवी करण्याच्या बहाण्याने थांबवून आधी कोयत्याने वार केले व नंतर पुरावा नष्ट करण्याच्या उद्देशाने दगडाने ठेचून त्याची हत्या केली. पोलिसांनी घटनास्थळावरून लपवून ठेवलेला कोयता जप्त केला आहे.
ही कामगिरी पोलीस आयुक्त अरविंद चावरीया, उपायुक्त गणेश शिंदे, रमेश धुमाळ, शाम घूगे व सहायक आयुक्त शिवाजी बचाटे यांच्या मार्गदर्शनाखाली पोलीस निरीक्षक संदीप चव्हाण इम्रान नायकवडे, अनिकेत कासार यांच्यासह गुन्हे शाखेच्या पथकाने पार पाडली.
