‘सेल्फी’च्या नादात दोन विद्यार्थ्यांचा बुडून मृत्यू

धोकादायक ठिकाणी ‘सेल्फी’ काढून समाज माध्यमांव्दारे मित्रांमध्ये मिरवून घेण्याच्या वेडामुळे अनेक जणांचे बळी गेले असतानाही त्यापासून कोणताही धडा शिकण्यास तरूणाई तयार नसल्याचे दिसून येत आहे.
सेल्फीच्या या वेडापायी येथील दोन तरूणांचा वालदेवी धरण परिसरात बुडून मृत्यू झाल्याची घटना शनिवारी घडली. हे दोघेही बारावीचे विद्यार्थी होते.
शनिवारी १२ वीची प्रात्यक्षिक परीक्षा संपल्यानंतर उत्तमनगरमधील वावरे महाविद्यालयाचे १० विद्यार्थी वालदेवी धरण परिसरात फिरण्यासाठी गेले. दुपारी अडीचच्या सुमारास आहुर्ली येथील मूळ रहिवासी अजिंक्य भाऊसाहेब गायकर (१८) आणि त्याचा मित्र सौरभ उर्फ देवराम जगन्नाथ चुळभरे (१८) हे सेल्फी काढण्यासाठी धरणात धोक्याच्या ठिकाणी उभे राहिले. सेल्फी काढण्याच्या नादात अजिंक्यचा पाय घसरल्याने सौरभने त्याला वाचविण्याचा प्रयत्न केला. मात्र खोलीचा अंदाज न आल्याने दोघेही बुडाले.
अन्य मित्रांनी मदतीसाठी आरडाओरड केल्यावर धरण परिसरात मासेमारी करणाऱ्यांनी त्यांना पाण्यातून बाहेर काढले. मात्र नाकातोंडात पाणी गेल्याने त्यांचा मृत्यू झाला. या प्रकरणी वाडीवऱ्हे पोलीस ठाण्यात गुन्हा नोंदविण्यात आला आहे.