जळगावहून मुंबईला जाणारे नायब तहसीलदार घोटी टोल नाक्यावर विश्रांतीसाठी थांबले असता, अज्ञात चोरट्याने बेसावधपणाचा फायदा घेऊन त्यांच्या वाहनातील रोख रक्कम व मोबाईल असा एकूण ५२ हजार रुपयांचा मुद्देमाल चोरून नेला. घोटी पोलीस ठाण्यात याबाबत गुन्हा दाखल करण्यात आला आहे. पोलिसांनी दिलेल्या माहितीनुसार, जळगाव येथील नायब तहसीलदार विकास प्रल्हाद लाडवंजारी हे आपल्या खासगी कामानिमित्त जळगावहून मुंबईला जात होते. शुक्रवारी मध्यरात्री अडीच वाजेच्या सुमारास थकव्यामुळे ते घोटी टोल नाक्यावर थांबले. रस्तालगत वाहन उभे करून ते वाहनातच झोपले. अज्ञात चोरट्यानी याचा फायदा घेत वाहनातून हा मुद्देमाल लंपास केला. दरम्यान, याबाबत घोटी पोलीस ठाण्यात त्यांनी तक्रार दाखल केली.
