‘शिवभोजन थाळीची नियमित तपासणी होणार’

नाशिक : शिवभोजन केंद्रावर स्वच्छ स्वरूपात आणि चांगल्या दर्जाचे जेवण नागरिकांना उपलब्ध करून देण्यात येणार आहे. त्यानुसार शिवभोजन केंद्रांसह त्याअंतर्गत दिल्या जाणाऱ्या भोजनाची नियमित तपासणी करण्यात येणार असल्याचे अन्न नागरी पुरवठा तथा पालकमंत्री छगन भुजबळ यांनी सांगितले. कृषी उत्पन्न बाजार समितीच्या आवारातील प्रेरणा महिला बचत गट संचालित बळीराजा रेस्टॉरंट येथे शिवभोजन केंद्राच्या उद्घाटनप्रसंगी ते बोलत होते.

प्रजासत्ताक दिनाच्या निमित्ताने राज्यभर ५० हून अधिक ठिकाणी शिवभोजन प्रकल्प सुरू होत आहे. जिल्ह्य़ात चार ठिकाणी प्राथमिक स्वरूपात उद्घाटन होत असून यातून दररोज ७०० नागरिकांना जेवण दिले जाणार आहे. भोजनालये दुपारी १२ ते दोन या कालावधीत कार्यरत राहणार असल्याचे त्यांनी सांगितले.

या योजनेत मध्यवर्ती किचन आणि स्वयंसेवी संस्था यांनी आपला सहभाग नोंदविण्याचे आवाहन जिल्हाधिकारी सूरज मांढरे यांनी केले. प्रेरणा महिला बचत गट अध्यक्ष कविता कर्डक यांनी या योजनेच्या माध्यमातून बचत गटांना रोजगार उपलब्ध होण्यास मदत होणार असल्याचे सांगितले. उद्घाटनप्रसंगी भुजबळ यांनी लाभार्थ्यांना स्वहस्ते शिवभोजन थाळीचे वाटप केले. या वेळी जिल्हा परिषद अध्यक्ष बाळासाहेब क्षीरसागर, जिल्हाधिकारी सूरज मांढरे, प्रेरणा महिला बचत गट अध्यक्षा कविता कर्डक आदी उपस्थित होते.

प्रतिसाद पाहून विस्तार

योजनेच्या पहिल्या टप्प्यात प्रायोगिक तत्त्वावर प्रत्येक जिल्ह्याच्या मुख्यालयी किमान एक भोजनालय तसेच प्रत्येक भोजनालयात कमाल ५०० थाळी सुरू करण्यास शासनाची मान्यता देण्यात आली आहे. यास मिळणारा प्रतिसाद पाहून ही योजना राज्याच्या इतर भागात राबविण्यात येईल.