नवी मुंबई : सिडको प्रदर्शनी केंद्रातील करोना अतिदक्षता सेवाही बंद

शहरात करोना संसर्ग पसरल्यानंतर पालिका प्रशासनाने वाशी येथील पालिका रुग्णालय करोना समर्पित रुग्णालय केले होते. मात्र रुग्ण वाढत गेल्याने पालिकेची अस्तित्वात असलेली आरोग्य व्यवस्था तोकडी पडत गेली. त्यामुळे प्रशासनाने वाशी येथील सिडको प्रदर्शनी केंद्रात जम्बो करोना काळजी केंद्र सुरू केले. हळूहळू आरोग्य सुविधांत वाढ करीत १२०० खाटांच्या या रुग्णालयात करोनासाठीच्या आवश्यक सर्व सुविधा उपलब्ध करून देण्यात आल्या. त्यामुळे या संकटात नवी मुंबईकरांसाठी हे रुग्णालय मोठा आधार ठरले. या रुग्णालयात ११ जून २०२० रोजी करोनाचा पहिला रुग्ण दाखल झाला होता. तेव्हापासून रुग्णालय बंद करेपर्यंत २२,८५७ रुग्णांवर मोफत उपचार करण्यात आले आहेत.

हे केंद्र सिडकोचे असून त्यांच्याकडून ती जागा घेण्यात आली होती. करोनाची चौथी लाट ओसरल्यानंतर शहरात करोनाची परिस्थीती अत्यंत नियंत्रणात आल्यानंतर पालिका प्रशासनाने हे केंद्र पुन्हा सिडकोकडे देण्याचा निर्णय घेत येथील आरोग्य सेवा बंद करण्याचा निर्णय घेतला. काही दिवसांपूर्वी येथील ७५ खाटांचा अतिदक्षता विभाग वगळता इतर सुविधा बंद केल्या होत्या. आता गेले काही दिवस एकही रुग्ण या ठिकाणी उपचार घेत नसल्याने अतिदक्षता सेवाही बंद करण्याचा निर्णय घेत प्रवेश बंद केला आहे. अत्यावश्यक परिस्थिती निर्माण झाल्यासच त्याचा वापर करण्याची व्यवस्था करण्यात आली आहे. पालिका प्रशासनाने पर्यायी व्यवस्था म्हणून नियोजन केले आहे. वाशीतील पालिका रुग्णालयातील बारा तर नेरुळ व ऐरोली रुग्णालयात प्रत्येकी ६ खाटांची सुविधा निर्माण केली आहे.

करोनाच्या काळात महापालिकेने सिडकोचे वाशी येथील प्रदर्शनी केंद्र येथील जागा ताब्यात घेऊन १२०० खाटांचे करोना रुग्णालय निर्माण केले होते. तेथील सेवा बंद केली असून ७५ खाटांची आयसीयू सुविधा येथेही प्रवेश दिले जात नसून वाशी व नेरुळ ,ऐरोली येथे करोनासाठी व्यवस्था करण्यात आली आहे. – अभिजीत बांगर, आयुक्त, महापालिका