उरण : नगर परिषदेने उरण शहरातील बेशिस्त वाहतूक कोंडी सोडविण्यासाठी जनजागृतीसाठी डॉक्युमेंट्री तयार केली आहे. मात्र मंगळवारी १२ वीच्या विद्यार्थ्यांच्या परीक्षेच्या वेळी उरण शहरातील सेंट मेरीज स्कुल या परीक्षा केंद्राजवळ वाहनांची गर्दी झाली होती. याचा फटका परीक्षार्थींना ही बसला. ही कोंडी सेंट मेरीज स्कुल ते जरी मरी मंदीर आणि उरण मोरा रस्त्यापर्यंत पोहचली होती. १२ वीच्या महत्वाच्या परीक्षेच्या वेळी उरण शहरातील वाहतुकीचे नियोजन नसल्याने ही स्थिती उद्भवली होती. उरण शहरातील वाहतूक कोंडीला वाहन चालक आणि नागरीक ही जबाबदार असून विदयार्थ्यांना शाळेत सोडण्यासाठी येणारे पालक आणि वाहने घेऊन येणारे विद्यार्थी यांच्या बेशिस्तीने रस्त्यात वाहने उभी केल्यानेही कोंडीत भर पडली. उरण शहरातील वाहतूक कोंडी ही येथील वाहनचालक आणि नागरीक यांच्यासाठी नेहमीच झाली आहे. या कोंडीतुन सुटका करण्यासाठी उरण नगर परिषदेच्या वतीने नागरिकांच्या जनजागृतीसाठी एक डॉक्युयमेंट्री तयार केली आहे. मात्र वाहतूक कोंडी दूर करण्यासाठी नगरपरिषद आणि वाहतूक विभाग यांच्या नियोजनाची आवश्यकता आहे. या दोन्ही विभागांच्या धरसोड वृत्तीमुळे उरण शहरातील कोंडीची समस्या कायम आहे. या कोंडीचा फटका १२ वीच्या परीक्षेच्या पहिल्याच दिवशी बसला. पुढील महिनाभर या परीक्षा सुरू राहणार आहेत. तर ३ मार्च पासून १० वीच्या ही परीक्षा सुरू होणार असल्याने उरण नगर परिषद आणि वाहतूक विभागाने शहरातील वाहतुकीचे नियोजन करण्याची मागणी नागरिकांकडून केली जात आहे.
