नवी मुंबईतील कोपरखैरणे नोड येथे एका मैदानात युवकाचा मृतदेह आढळून आला आहे. आज सकाळी प्रभात फेरीसाठी आलेल्या काही जणांनी मृतदेह पाहताच या बाबत पोलिसांना माहिती दिली. कोपरखैरणे सेक्टर २३ येथील भूमिपुत्र मैदानात एका युवकाचा मृतदेह आढळून आला. त्याच्या कडील कागदपत्रांवरून त्याची ओळख पटली असून साहिल शांताराम गोळे (वय १७) असे त्याचे नाव आहे. हा युवक कोपरखैरणे सेक्टर १५ येथे राहणारा असून यशवंतराव चव्हाण महाविद्यालयात १२ वी इयत्तेमध्ये तो शिकत होता. त्याची डोक्यात दगड घालून हत्या केल्याचे निदर्शनास आले आहे. या परिसरात सकाळी मोठ्या प्रमाणात प्रभात फेरीसाठी लोक येत असतात. त्यातील काही जणांनी हा मृतदेह पाहताच पोलिसांना माहिती दिली. सदर मृतदेह ताब्यात घेत वैद्यकीय तपासणीसाठी प्रथम संदर्भ रुग्णालयात दाखल करण्यात आला आहे. ही हत्या कुणी आणि कशासाठी केली या बाबत तपास सुरू आहे अशी माहिती वरिष्ठ पोलीस निरीक्षक प्रदीप तीदार यांनी दिली.
